કવર સ્ટોરી

ટ્રમ્પને મુસ્લિમોનું સમર્થનઃ ટ્રમ્પનાં આઠ ‘ટ્રેપકાર્ડ'નો ચમત્કાર

- તરુણ દત્તાણી

અમેરિકાના પ્રમુખપદની ચૂંટણીમાં વિજય મેળવીને રિપબ્લિકન ડોનાલ્ડ ટ્રમ્પે વિક્રમ સર્જ્યો છે. અમેરિકાના ઇતિહાસમાં ૧૩૧ વર્ષ પછી કામબૅક કરનાર તેઓ પ્રથમ પૂર્વ પ્રમુખ બન્યા છે. તેમના વિજયમાં કેટલાંક અનોખાં ‘ટ્રુપકાર્ડ' હતાં, જેમનો આભાર અને અભિવાદન ડોનાલ્ડ ટ્રમ્પે વિજય પછીના સંબોધનમાં કર્યું હતું. ટ્રમ્પે તેમની ચેમ્પિયન ટીમનો પરિચય કરાવ્યો હતો અને તેમના વિજયનો યશ તેમને આપ્યો હતો. તેમાં એલન મસ્કનો સમાવેશ પણ થાય છે. મસ્કની તેમણે ખૂબ પ્રશંસા કરી તેમણે કહેલું - આપણી વચ્ચે એક નવા સ્ટારનો જન્મ થયો છે : એલન. એ અદ્ભુત વ્યક્તિ છે. તેમણે ફિલોડેલ્ફિયા, પેન્સિલવેનિયામાં પ્રચાર માટે બે સપ્તાહ ગાળ્યા હતા.

મેલાનિયા ટ્રમ્પ : ડોનાલ્ડ ટ્રમ્પે ચૂંટણી પ્રચાર ઝુંબેશમાં પોતાની પત્ની મેલાનિયાના પ્રદાન અને પરિશ્રમને બિરદાવતાં તેમને આલિંગન આપી ચુંબન કર્યું હતું. તેમણે મેલાનિયાના પુસ્તકના પણ વખાણ કર્યા અને દેશમાં સૌથી વધુ વેચાયેલ પુસ્તક ગણાવ્યું હતું. મેલાનિયાએ ઘણું ઉત્તમ કામ કર્યું હોવાનું તેમણે કહ્યું હતું.