ભારતીય અર્થતંત્રઃ અપના ટાઈમ આ ગયા!

અનેક અંતરાય પાર કરી ભારતીય અર્થતંત્ર મજબૂતી તરફ આગળ વધી રહ્યું છે. ૨૦૨૨માં ભારતની અનેક સફળતા આંખ સામે આવી. ૨૦૨૩ માટે પણ આશાવાદ ઊંચો રાખવાનાં કારણ છે. વિશ્વના બીજા ઘણા દેશ વચ્ચે ભારત પોતાનું એક આગવું સ્થાન બનાવી રહ્યું છે.

- જયેશ ચિતલિયા

દેશ બદલ રહા હૈ, ઈન્ડિયા બદલ રહા હૈ..

આવા સંવાદ કે સૂત્ર આપણે છેલ્લાં બે-ચાર વરસથી વધુ જોરથી સાંભળી રહ્યા છીએ. હકીકત આપણી સામે છે. તેમ છતાં બધું સુધરી ગયું છે, બધું જ સારું થઈ ગયું છે એવું કહી શકાય નહીં, હજી ઘણી ક્ષતિઓ-ત્રુટિઓ, અભાવો, નકારાત્મકતા-નબળાઈઓ છે, પણ રંગ દે બસંતી ફિલ્મના એક સંવાદને યાદ કરી આપણે બધાએ એ કહેવું પડે કે કોઈ દેશ પરફેક્ટ નહી હોતા, ઉસે પરફેક્ટ બનાના પડતા હૈ.. અને આ માટે દરેક નાગરિકનો સકારાત્મક ફાળો જરૂરી છે. માત્ર નિંદા, વિરોધ, વિવાદો કરતાં રહેવું એ તો સાવ સરળ બાબત છે. ખેર, આપણે અહીં ફિલોસોફીની વાત કરવી નથી, આપણે વર્તમાન વાસ્તવિકતા પર આવી જઈએ.

એકમાત્ર સક્ષમ અર્થતંત્ર