કોનું સાચું? કેટલું સાચું?

હમણાં ચર્ચાનો વિષય બનેલી કંપની ‘હિંડનબર્ગ રિસર્ચ’ના એક રિપોર્ટને કારણે ‘અદાણી જૂથ’ની આશરે ૧૮ ટકા મિલકત ધોવાઈ ગઈ. રોકાણકારોને આટલો મોટો ફટકો આપનારી આ કંપની આખરે છે કોની અને કઈ રીતે કામ કરે છે?

ગૌતમ અદાણી-નેથન એન્ડરસન આ શબ્દયુદ્ધમાં સત્ય કોની સાથે?

૬ મે, ૧૯૩૭ની સાંજ.

જર્મનીના ફ્રેન્કફર્ટ શહેરથી ૬૨ પેસેન્જર લઈને અમેરિકાના ન્યુ જર્સી જતી ઍરશિપમાં લૅન્ડિંગ કરતી વખતે આગ લાગી ગઈ. અચાનક લાગેલી આ આગ થોડી વારમાં વકરી અને ઍરશિપમાં સવાર ૩૬ પેસેન્જરે પોતાનો જીવ ગુમાવ્યો. મૂળ જર્મન ફીલ્ડ માર્શલ પોલ વોન હિંડનબર્ગના માનમાં આ ઍરશિપને હિંડનબર્ગ નામ આપવામાં આવ્યું હતું એટલે આ દુર્ઘટના પણ હિંડનબર્ગ ટ્રેજેડી તરીકે ઈતિહાસમાં નામાંકિત થઈ.

ખેર, આ તો થઈ સાડા આઠ દાયકા જૂની વાત, પરંતુ અત્યારે ફરી એક વાર હિંડનબર્ગ નામ ચર્ચાનો વિષય બન્યું છે. ૧૯૩૭ની દુર્ઘટનાથી પ્રેરાઈને ૨૦૧૭માં શરૂ થયેલી મૂળ અમેરિકાની એક પ્રાઈવેટ ફાઈનાન્સ રિસર્ચ કંપનીનું નામ પણ હિંડનબર્ગ રિસર્ચ રાખવામાં આવ્યું છે. ૧૯૩૭માં જે દુર્ઘટના થઈ એમાં એ વખતના પ્રશાસકોએ આંખ આડા કાન કર્યા હતા, જેનું પરિણામ માસૂમ લોકોએ ભોગવવું પડ્યું હતું, પણ હવે ફાઈનાન્સ માર્કેટમાં ગરબડ કરનારા લોકોને કારણે ફરી કોઈ વિશ્વાસ કરનારી વ્યક્તિનું નુકસાન ન થાય એવા આશયથી શરૂ કરવામાં આવી હોવાને કારણે આ કંપનીનું નામ હિંડનબર્ગ રાખવામાં આવ્યું છે.