ભૂકંપનો ભય ઘરમાં નહીં, શેરીઓમાં સૂવે છે આખું ગામ..

ફેબ્રુઆરી મહિનાની શરૂઆતમાં ધરતી ધ્રૂજી અને પળવારમાં તુર્કી તહસનહસ થઈ ગયું ત્યારે ગુજરાતીઓને બે દાયકા પહેલાંના કચ્છના ભયાનક ભૂકંપની યાદ તાજી થઈ.. હવે સૌરાષ્ટ્રમાં મિતિયાળા પંથકના પેટાળમાં મોટી હલચલ મચી છે ત્યારે શું છે ગામલોકોની હાલત? એક મોટો આંચકો આવશે તો ઘરમાં દટાઈને મરી જવાના ડરે સેંકડો લોકોને રાતોની રાત શેરીમાં રહેવાની ફરજ પડી છે.. જો કે ખુલ્લામાં સૂવાથી રાત્રે કોઈ જંગલી પ્રાણીનો શિકાર થઈ જવાનો પણ ડર તો ખરો જ ને?! વાંચો, ગ્રાઉન્ડ ઝીરોથી ‘ચિત્રલેખા’નો ચોંકાવનારો અહેવાલ.

- દેવેન્દ્ર જાની (મિતિયાળા-અમરેલી) । તસવીરોઃ નીશુ કાચા

રાતના નવ વાગવા આવ્યા છે. સિંહ-દીપડાનો રા ભય ઝળંબતો હોય એવા વિસ્તારનાં ગામોમાં સામાન્ય રીતે આવા સમયે સન્નાટો થઈ જતો હોય. લોકો સાંજ પડતાંની સાથે જ ઘરમાં ઘૂસી ગયા હોય. સાવજનો સામનો કરવા કરતાં ખોરડામાં થોડી સલામતી તો ખરી.

જો કે અમરેલી જિલ્લામાં ડુંગરાની વચ્ચે આવેલા મિતિયાળા ગામમાં માહોલ કંઈક જુદો જ છે.

ભૂકંપના હળવા પણ એકધારા આંચકાથી મિતિયાળા જેવા ગામમાં ઘરની દીવાલોમાં તિરાડ પડી છે તો ક્યાંક દીવાલ જ આખી ધસી પડી છે. મોટા ભાગના પરિવારોનું રસોડું ઘરની બહાર ચાલે છે અને લોકો રાત્રે સૂવે છે પણ ઘરની બહાર.

કાચાં મકાનો અને ઝૂંપડાંમાં ઢબૂરાઈ જવાને બદલે મહિલા અને બાળકો સહિત મોટા ભાગના રહેવાસીઓ હજી શેરીઓમાં દેખાય છે. ઘોડિયાંખાટલા પણ શેરીમાં ગોઠવેલાં નજરે પડે છે. અમુક લોકો સૂઈ ગયા છે તો બીજા કેટલાક રાતે ટોળે મળીને વાત કરી રહ્યા છે. જાણે આખી રાત ઘરની બહાર વિતાવવાના હોય. સુસવાટા મારતા પવનની વચ્ચે અમુક પુરુષો તાપણાં ફરતે બેઠા છે.

ગામની દરેક શેરીમાં મોડી રાત સુધી આ જ દૃશ્ય. કોઈ ઘરમાં જવાનું નામ જ ન લે. કોઈને ઘર વિશે પૂછીએ તો ચહેરા પર ભયનો ઓછાયો ડોકાઈ જાય.

મિતિયાળા ગામમાં ડરનો આવો માહોલ એક-બે દિવસથી નથી, પણ છેલ્લા દોઢેક મહિનાથી ગામના લોકો આવી વેદના સાથે દિવસો પસાર કરી રહ્યા છે.. અને આવી હાલત પણ માત્ર મિતિયાળા ગામની નથી, આ પંથકના આસપાસનાં પંદરથી ૨૦ ગામના લોકો ભયથી ફફડી રહ્યા છે.

એમનો ડર સ્વાભાવિક પણ છે. છેલ્લાં બે વર્ષમાં અહીં ધરતીકંપના ૪૦૦ જેટલા આંચકા નોંધાયા છે. એમાં પણ જાન્યુઆરીથી એટલે કે આ વર્ષની શરૂઆતથી ભૂકંપની તીવ્રતા વધી ગઈ છે. અમુક ઘરમાં તિરાડ પણ પડી ગઈ છે. રખે રાતવરતના એક મોટો આંચકો આવે ને.. તો? એ ડરે આખા વિસ્તારના લોકો ફરજિયાત ઘરની બહાર જ રહે છે. રાત્રે તો ખાસ. આમ તો જાયે તો જાયે કહાં જેવી સ્થિતિ. રાત વચાળે આજુબાજુનાં જંગલમાંથી કોઈ રાની પશુ આવી ચડવાનો ડર તો બીજી બાજુ ધરતી ધ્રૂજી ઊઠવાનો ભય!