બિપરજૉય: ઘાત ટળી, પણ ઘા રુઝાતાં વાર લાગશે..

જૂન મહિનાની શરૂઆતમાં ચોમાસાની રાહ જોવાતી હતી ત્યાં વાવડ આવ્યા કે અરબી સમુદ્રમાં સૌરાષ્ટ્રના સાગરકિનારેથી આશરે ૯૦૦ કિલોમીટર દૂર ભયાનક ચક્રવાત સર્જાયું છે અને એ તોફાની પવન સાથે સર્પાકારે ઉત્તર-પૂર્વ તરફ આગળ વધી રહ્યું છે. જાનમાલની ભયંકર તારાજીની સંભાવના હતી, પણ કેન્દ્ર-રાજ્ય સરકાર, સમગ્ર વહીવટી તંત્ર તથા સામાજિક સંસ્થાઓએ લીધેલાં સાવચેતીનાં ત્વરિત પગલાંને કારણે જાનહાનિ ટળી. અલબત્ત, સૌરાષ્ટ્ર-કચ્છને ધમરોળી રાજસ્થાન તરફ આગળ વધી ગયેલા આ વાવાઝોડાએ જતાં જતાં બનાસકાંઠા અને પાટણ સહિત ઉત્તર ગુજરાતમાં પણ મોટું આર્થિક નુક્સાન પહોંચાડ્યું.

- દેવેન્દ્ર જાની (રાજકોટ) । સુનીલ માંકડ (ભૂજ) । પાર્થ સુખપરિયા (દ્વારકા-જામનગર)

પ્રભુ.. કાળિયા ઠાકરની મહેરબાની થઈ કે બિપરજાય નામની ભયંકર નામની ભયંક આફત માથે આવી પણ કોઈનો જીવ ના લીધો. હેમખેમ બધું પાર પડી ગયું. તોફાની પવન અને ભારે વરસાદથી તારાજી થઈ, પણ એને પહોંચી વળીશું. જાન બચી તો લાખો પાયે..

પોરબંદર નજીકના દરિયાકિનારે હર્ષદ ગામના ખેડૂત શામજીભાઈ પટેલ ભારે પવન વચ્ચે વાવાઝોડાની ઘાત વિશે કહી રહ્યા છે. એમના શબ્દોમાં સૌરાષ્ટ્ર-કચ્છના લોકોનાં માનસનું પ્રતિબિંબ પડે છે.

આ વાવાઝોડાને કારણે સૌરાષ્ટ્ર-કચ્છમાં ભારે અજંપો હતો. જેમ વાવાઝોડું નજીક આવતું હતું તેમ સાગરકાંઠે રહેતા લાખો લોકોના શ્વાસ ઊંચા ચડતા હતા, પરંતુ ૧૫ જૂનની સાંજે કચ્છના કિનારે ટકરાઈને વાવાઝોડું નબળું પડીને રાજસ્થાન તરફ ફંટાઈ જતાં તંત્રએ રાહતનો દમ લીધો. અલબત્ત, શક્તિશાળી વાવાઝોડાની ઘાત ટળી, પણ માલ-મિલકતને ભારે નુકસાન થયું.

લગભગ ૫૦૦ કિલોમીટરનો ઘેરાવો ધરાવતું આ ભયાનક વાવાઝોડું સૌરાષ્ટ્ર-કચ્છના દરિયાકાંઠા પર ભારે વિનાશ વેરશે એવી ભીતિ ઊભી થતાં કાંઠાળ વિસ્તારને ખાલી કરાવવામાં આવ્યો અને બંદરો પર અતિ ભયજનક ૧૦ નંબરનાં સિગ્નલ ચડાવી દેવામાં આવ્યાં.

આ વાવાઝોડું અતિ વિનાશકારી હોવાની ગંભીર ચેતવણી હવામાન વિભાગે અગાઉથી જ આપી દેતાં સરકાર અને લોકો સતર્ક થઈ ગયાં. દેવભૂમિ દ્વારકા, જામનગર, પોરબંદર અને કચ્છને રેડ એલર્ટ ડિસ્ટ્રિક્ટ જાહેર કરીને સરકારે સાવચેતીનાં પગલાં સમયસર લીધાં. મુખ્ય પ્રધાન ભૂપેન્દ્ર પટેલે સંભવિત અસરગ્રસ્ત જિલ્લાઓમાં પાંચ દિવસ પહેલાં જ જુદા જુદા મંત્રીઓને મોકલી આપ્યા હતા. અધિકારીઓની ટીમ-રેસ્ક્યુ ટીમ ખડે પગે હતી. આ વખતે પહેલી વાર મિડિયા અને લોકોએ એવું અનુભવ્યું કે મંત્રીઓ અને અધિકારીઓ માત્ર ફોટો સેશન માટે નહીં, પણ ખરેખર લોકોને આફતમાંથી ઉગારવા આવ્યા હોય એમ કામ કરતા હતા. કેન્દ્રીય મંત્રીઓ પણ સ્થળાંતર માટે રાજી ન હોય એવા પરિવારોને સમજાવવા ઝૂંપડાંઓમાં ફરી વળ્યા હતા.