મુંબઈ-મહારાષ્ટ્રની મૂંઝવણ કેવી છે?

છેલ્લાં બે-ત્રણ વર્ષના રાજકીય દાવપેચમાં મહારાષ્ટ્રનું રાજકારણ ખાસ્સું ઉપર-તળે થયું. ૨૦ મેએ મુંબઈ સહિત મહારાષ્ટ્રની કેટલીક બેઠકો પર મતદાન થવાનું છે ત્યારે તદ્દન અસ્પષ્ટ સ્થિતિમાં અટવાયેલા મતદારો પૂછે છેઃ ‘ક્યા કરે, ક્યા ના કરે...’

- સમીર પાલેજા (મુંબઈ)

રાજકારણમાં કાયમી શત્રુ કે મિત્ર હોતા નથી એ વાતનો મહારાષ્ટ્રના મતદારોને પ્રેક્ટિકલ અનુભવ છે, જેમ કે ૨૦૧૯માં દરેક સભામાં નરેન્દ્ર મોદીને દેશની શાન ગણાવનારા શિવસેનાના સંજય રાઉત હવે મોદીની સરખામણી ઔરંગઝેબ સાથે કરીને એમને મહારાષ્ટ્રની ધરતીમાં દાટી દેવાની ધમકી આપે છે.

રાષ્ટ્રવાદી કોંગ્રેસ (એનસીપી)ના અજિત પવારના કથિત સિંચાઈ સ્કેમ સામે વર્ષો સુધી કાગારોળ મચાવનારા ભાજપના નેતાઓ-કાર્યકરો હવે અજિતદાદાના ઉમેદવારો માટે પ્રચાર કરી રહ્યા છે. એમ તો ૨૦૧૪થી ૨૦૧૯ સુધી ભાજપના સાંસદ તરીકે નરેન્દ્ર મોદીનું સમર્થન કરનારા નાના પટોળે (હવે મહારાષ્ટ્ર કોંગ્રેસના પ્રદેશ અધ્યક્ષ) કહે છે કે અમે સત્તા પર આવીશું તો રામમંદિરને ગંગાજળથી ધોઈને શુદ્ધ કરી નાખીશું. આવા તો અનેક રાજકીય વિરોધાભાસ મુંબઈ-મહારાષ્ટ્રના ચૂંટણીમંચ પર ભજવાઈ રહ્યા છે.

૧૯૭૭થી તમામ ચૂંટણી કવર કરનારા મહારાષ્ટ્રના વરિષ્ઠ પત્રકાર અને રાજકીય વિશ્લેષક પ્રકાશ આકોલકર ચિત્રલેખાને કહે છેઃ ‘મહારાષ્ટ્રમુંબઈ માટે આ પહેલી ચૂંટણી એવી છે જેમાં મતદારોને આકર્ષે કે એમને રસ પડે એવો કોઈ ચોક્કસ મુદ્દો નથી, જેમ કે મરાઠવાડાના સૌથી વિકસિત શહેર લાતુરમાં સપ્તાહમાં એક જ વાર પાણી આવે છે, છતાં આશ્ચર્યજનક રીતે ચૂંટણીમાં આ સમસ્યા મુદ્દો જ ન બની. જાન્યુઆરીમાં અધૂરા મંદિરે રામલલ્લાની પ્રાણપ્રતિષ્ઠા કરાવીને એને ચૂંટણીનો મુદ્દો બનાવવાની ભાજપની ગણતરી હતી, પણ મહારાષ્ટ્રના લોકો તો શું, ભાજપના ઉમેદવારો સુદ્ધાં હવે રામમંદિરને ભૂલી ગયા છે. અરે, મોદીજી પોતે જ એટલા ગૂંચવાયેલા લાગે છે કે એમણે એક સભામાં શરદ પવારને ભટકતો આત્મા કહ્યા તો બીજી સભામાં ભાજપના સાથી થવાનું આમંત્રણ આપી દીધું. સામે પક્ષે ઉદ્ધવ ઠાકરે અને શરદ પવાર બેરોજગારી જેવા મુદ્દા ઉખેળી રહ્યા છે અને પ્રિયંકા ગાંધીને પણ મહારાષ્ટ્રમાં સપોર્ટ મળી રહ્યો છે.