આ છે હજારો વૃક્ષોની જનેતા

વ્યવસાયે એ શિક્ષિકા, પણ ઝાડપાન પ્રત્યે ગજબનો પ્રેમ, જેને કારણે પોતાનું સમગ્ર જીવન એમના નામે કર્યું. એટલું જ નહીં, અમદાવાદની બીજી ઘણી મહિલાઓને પણ એમણે હરિયાળીની રખેવાળ બનાવી પ્રકૃતિ તરફ વાળી છે.

- હેતલ રાવ

અમદાવાદના શાહપુર વિસ્તારમાં આવેલા હઠીસિંહના દેરાસરમાં એ બહેન નિયમિત જાય. એક દિવસ એ નિત્યક્રમ પ્રમાણે દર્શન કરી દેરાસરના પરિસરમાંથી બહાર નીકળી રહ્યાં હતાં. ત્યાં ઘણા નાના રોપા પડ્યા હતા. એમણે કોઈને પૂછ્યું તો ખબર પડી કે દેરાસરમાં યોગનું શિક્ષણ આપતા ગુરુદેવ આચાર્ય ચંદ્રભાનુ ભટ્ટાચાર્યજીએ જે ભાઈને રોપા લગાડવાનું કામ સોંપ્યું હતું એ બહાર ગયા હતા અને એમને પાછા આવવામાં મોડું થયું હતું.

એ ગૃહિણીએ રોપા વાવવાનું કામ પોતાને હસ્તક લીધું અને ખુશી ખુશી રોપાની વાવણી કરી. આચાર્ય ચંદ્રભાનુને વાતની ખબર પડી. એ આ કામ જોઈને ખુશ થઈ ગયા. એમણે પેલાં ગૃહિણીને બોલાવીને કહ્યું કે આજથી તારે જ આ પ્રાંગણમાં વૃક્ષ રોપવાથી લઈને એને ઉછેરવાનું કામ કરવાનું. ગૃહિણી માટે તો ભાવતું'તું ને વૈદે કહ્યું જેવો ઘાટ થયો. ત્યારની ઘડી ને આજનો દી, અંજનાબહેન શાહ એક વચનની જેમ એ કામ નિભાવે છે.

પછી તો ગુરુચરણ ગ્રીન રિવોલ્યુશન ટ્રસ્ટનાં પ્રમુખ તરીકે અંજના શાહે અમદાવાદના શાહીબાગ વિસ્તારથી લઈને ગૂજરાત યુનિવર્સિટી રોડ જેવા શહેરના અનેક વિસ્તારમાં પચ્ચીસ હજારથી વધુ વૃક્ષો વાવ્યાં છે. આ ઉપરાંત, ગાંધીનગરનાં જુદાં જુદાં સ્થળે પાંચ હજારથી વધુ અને દાંતીવાડામાં એક હજાર જેટલાં વૃક્ષો વાવ્યાં છે. એટલું જ નહીં, વૃક્ષોની જનેતા બનીને એ આ વૃક્ષોનું જતન પણ કરે છે.

મૂળ રાજસ્થાનનાં અને મહારાષ્ટ્રના દહાણુ ગામમાં ઊછરેલાં અંજનાબહેનને પહેલેથી જ વૃક્ષો પ્રત્યે અપાર સ્નેહ. જો કે પોતાનાં રોજબરોજનાં કામકાજ અને વ્યસ્ત જીવનમાં વૃક્ષોને સમય ન આપી શકે, છતાં પોતાની આસપાસનાં થોડાં વૃક્ષોને રોજ પાણી પિવડાવી એની સાથે થોડી વાત કરવાનો એમનો વર્ષો જૂનો નિયમ.