બાંગ્લા પ્રજામાં આટલો ભારતદ્વેષ શા માટે?

શેખ હસીનાની હકાલપટ્ટી પછી પણ બાંગ્લાદેશમાં ભારત સામેનો રોષ વધી રહ્યો છે અને એની પાછળનું મુખ્ય કારણ છે ધાર્મિક કટ્ટરવાદ.

- હીરેન મહેતા

મજહબના નામે આંખમાં આંજવામાં આવતું ઝનૂન કેવું ઝેરીલું હોય એનો તાજો દાખલો અત્યારે આપણને બાંગ્લાદેશમાં જોવા મળે છે. ભારતે માથે ઊભા રહીને મૂળ પાકિસ્તાનના આ પૂર્વ હિસ્સાને આઝાદી અપાવી હતી, એનો ગણ ભૂલી જઈ બાંગ્લા પ્રજા અત્યારે એમને ત્યાં ચાલી રહેલાં દરેક અનિષ્ટ માટે દોષનું નાળિયેર ભારતને માથે ફોડે છે. ઓગસ્ટ મહિનાની શરૂઆતમાં ભારતતરફી મનાતાં વડા પ્રધાન શેખ હસીનાને એમનો હોદ્દો છોડી ભાગવાની ફરજ પડી ત્યારથી બાંગ્લાદેશમાં જબરો ભારતવિરોધી માહોલ જામ્યો છે અને એ દિવસે ને દિવસે વધુ બળવત્તર બની રહ્યો છે.

ભારે વરસાદને કારણે બાંગ્લાદેશના ઘણા વિસ્તારો પાણી પાણી થઈ ગયા, એ માટેનું પણ આળ આવ્યું ભારતના માથે.

બાંગ્લાદેશના વિકાસમાં અને રાજનીતિમાં ભારત રોડાં નાખે છે...થી માંડી બાંગ્લાદેશમાં પૂર આવે એ માટે ભારતે કેટલીક નદી પરના બંધના દરવાજા ખોલી નાખ્યા છે... એવા આક્ષેપ અત્યારે થઈ રહ્યા છે અને બાંગ્લાદેશનો એક પણ આગેવાન એના ખંડન માટે હરફ સુદ્ધાં ઉચ્ચારતો નથી. ઊલટું, બાંગ્લાદેશની વચગાળાની સરકારના સલાહકાર તરીકે હંગામી વડા પ્રધાન જેવો દરજ્જો ધરાવતા મોહમ્મદ યુનુસે તો છેલ્લા મહિના દરમિયાન ત્યાંના હિંદુઓ પર થયેલા અત્યાચારની ઘટનાઓ ભારત દર્શાવે છે એટલી વધારે નથી એવું સાફ સંભળાવી દીધું. ધર્માંધ બાંગ્લા પ્રજાના દમનથી ત્રાસીને જાન બચાવવા ભારતીય મૂળના હજારો લોકો (વિશેષતઃ હિંદુઓ) સરહદ ઓળંગવા મોટું જોખમ લઈ રહ્યા છે એ હકીકત મોહમ્મદ યુનુસ સિફતથી ભૂલી જાય છે.