കഴകം, വാദ്യകലാകാരന്മാർ ഒഴിഞ്ഞുകിടക്കുന്നത് 500 തസ്തികകൾ റിപ്പോർട്ട്ചെയ്യാതെ തിരുവിതാംകൂർ ദേവസ്വം

സംവരണം അട്ടിമറിച്ച് താത്കാലിക നിയമനം

- ആർ. ജയപ്രസാദ്

കഴകം, വാദ്യകലാകാരന്മാർ തുടങ്ങി ക്ഷേത്ര ജീവനക്കാരുടെ 500-ഓളം ഒഴിവുണ്ടായിട്ടും തിരുവിതാംകൂർ ദേവസ്വം ബോർഡ് റിപ്പോർട്ട് ചെയ്യുന്നില്ല. ദേവസ്വം റിക്രൂട്ട്മെന്റ് ബോർഡിന് നിയമനം വിട്ടുനൽകിയ തസ്തികകളാണിവ. നിയമനച്ചട്ടം തയ്യാറായിട്ട് നാളുകളായി ഒഴിവുകൾ റിക്രൂട്ട്മെന്റ് ബോർഡിനെ അറിയിക്കാതെ താത്കാലികാടിസ്ഥാനത്തിൽ സ്വന്തക്കാരെ നിയമിച്ചും നിലനിർത്തിയും മുന്നോട്ടു പോവുകയാണ്.

തിരുവിതാംകൂർ ദേവസ്വം ബോർഡിന് കീഴിലെ അമ്പലങ്ങളിലായി 200-ലേറെ കഴകം തസ്തികകളുണ്ട്. താത്കാലികക്കാരാണ് ജോലിചെയ്യുന്നത്. പകരക്കാർ എന്നപേരിലും കരാറുകാരെ നിയോഗിക്കുന്നുണ്ട്. പുലർച്ചെ മുതൽ ജോലിയുണ്ടെങ്കിലും ഇവർക്ക് തുച്ഛമായ വേതനമാണ് നൽകുന്നത്. അമ്പലത്തിന്റെ വരുമാനത്തിന്റെ അടിസ്ഥാനത്തിൽ പരമാവധി 300 രൂപയാണ് പ്രതിദിന വേതനം. ഇതിനെക്കാൾ വരുമാനം കുറവുള്ള മറ്റ് ദേവസ്വം ബോർഡുകൾ കുറേക്കൂടി മെച്ചപ്പെട്ട വേതനം നൽകുന്നുണ്ടെന്ന് ജീവനക്കാർ പറയുന്നു. 15 വർഷത്തിലേറെയായി ഈ ജോലി ചെയ്യുന്നവരുമുണ്ട്.