ജീവിതസമരം അഥവാ സി.കേശവന്റെ ജീവിതം

സ്ഫോടനാത്മകമായ പ്രസംഗങ്ങളും വേറിട്ട അഭിപ്രായപ്രകടനങ്ങളും - സമൂഹത്തിന്റെ അടിത്തട്ടിൽനിന്ന് ഉയർന്നുവന്ന് തിരു-കൊച്ചി മുഖ്യമന്ത്രി പദവിവരെയെത്തിയ സി. കേശവന്റെ ജീവിതത്തെ ഇവ എപ്പോഴും വേറിട്ടതാക്കി. നവോത്ഥാന കേരള ചരിത്രത്തിൽ ഒട്ടേറെ അപൂർവതകൾ നിറഞ്ഞ പേരാണ് സി. കേശവന്റേത്.

1891 മേയ് 23-ന് കൊല്ലം ജില്ലയിലെ മയ്യനാട്ട് തട്ടാന്റെ കിഴക്കേതിൽ വീട്ടിലാണ് സി. കേശവൻ ജനിച്ചത്. നെയ്ത്തുകാരനായ കുഞ്ചൻ പിതാവ്. അമ്മ ചക്കി. സാമൂഹിക പരിഷ്കർത്താവും കേരളകൗമുദി പത്രത്തിന്റെ സ്ഥാപകനുമായ സി.വി.കുഞ്ഞു രാമൻ മാതുലനായിരുന്നു. സ്കൂൾ പഠനത്തിനുശേഷം എറണാകുളം മഹാരാജാസ് കോളേജിൽ ചേർന്നു. ഗായകൻ, അഭിനേതാവ് തുടങ്ങിയ നിലകളിൽ പേരെടുത്തുവെങ്കിലും ജാതിയുടെ പേരിലുള്ള അധിക്ഷേപങ്ങൾ അനുഭവിക്കേണ്ടിവന്നു. വിദ്യാർഥിയായിരിക്കെത്തന്നെ ശ്രീനാരായണഗുരു, ഡോ. പൽപ്പു തുടങ്ങിയവരുടെ സമുദായോദ്ധാരണ പ്രവർത്തനങ്ങളിൽ ആകൃഷ്ടനായി. പഠനശേഷം അധ്യാപകനായും ജോലിചെയ്തു. 1920-ൽ സി.വി.കുഞ്ഞുരാമന്റെ മകൾ വാസന്തിയെ വിവാഹം കഴിച്ചു.

വിശ്വഭാരതി സർവകലാശാലയുടെ ധനശേഖരണാർഥം 1922 നവംബർ ഒമ്പതിന് രവീന്ദ്രനാഥ ടാഗോർ തിരുവനന്തപുരത്ത് എത്തി. തിരുവിതാംകൂർ മഹാരാജാവിന്റെ ക്ഷണം സ്വീകരിച്ചായി രുന്നു സന്ദർശനം. ടാഗോറിനുള്ള വരവേൽപ്പ് സമ്മേളനത്തിൽ കുമാരനാശാൻ രചിച്ച ദിവ്യകോകിലം എന്ന മംഗളകാവ്യവും ഉള്ളൂർ പരമേശ്വരയ്യർ, മള്ളൂർ ഗോവിന്ദപ്പിള്ള എന്നിവർ രചിച്ച കാവ്യങ്ങളും സി. കേശവൻ വേദിയിൽ ആലപിച്ച് ശ്രദ്ധ നേടി. ഇക്കാലത്താണ് അദ്ദേഹം ശ്രീനാരായണ ഗുരുവിനെ നേരിൽക്കണ്ടത്. ഗുരുവിന്റെ ഉപദേശപ്രകാരം തിരുവനന്തപുരം ലോ കോളേജിൽ ചേർന്നു. അഭിഭാഷകനായി കൊല്ലത്ത് പ്രാക്ടീസ് ആരംഭിച്ചു. എസ്.എൻ.ഡി.പി. യോഗത്തിന്റെ പ്രവർത്തകനുമായി. വൈകാതെ യോഗത്തിന്റെ ജനറൽ സെക്രട്ടറി പദവിയിലുമെത്തി.