ഡോ. വി.വി. വേലുക്കുട്ടി അരയൻ എന്ന ബഹുമുഖ പ്രതിഭ

വൈദ്യശാസ്ത്രത്തിലും സമുദ്രശാസ്ത്രത്തിലും നിയമത്തിലുമെല്ലാം ഒരുപോലെ പണ്ഡിതനായ ഡോ. വേലുക്കുട്ടി അരയൻ സാമൂഹികപ്രവർത്തനങ്ങളിലാണ് തന്റെ ശ്രദ്ധ കേന്ദ്രീകരിച്ചത്. അരയൻ എന്ന പത്രവും ഫിഷറീസ് മാഗസിനുമെല്ലാം മലയാള പത്രപ്രവർത്തനരംഗത്തെ പൊൻതൂവലുകളാണ്

- വി. രാധാകൃഷ്ണൻ

മൂന്ന് വൈദ്യശാസ്ത്ര ശാഖകളിലെ അറിവ്, നിയമവിദ്യാഭ്യാസം, സമുദ്രശാസ്ത്രപരിശീലനം സാമൂഹിക രാഷ്ട്രീയ മണ്ഡലങ്ങളിലെ നിറസാന്നിധ്യം. ജാതി വിവേചനത്തോടുള്ള എതിർപ്പ് സൂചിപ്പിക്കാൻ സ്വന്തം പേരിനൊപ്പം സമുദായപ്പേരും കൂട്ടിച്ചേർത്ത സാമൂഹിക വിപ്ലവകാരി. കേരള ചരിത്രത്തിലെ നവോത്ഥാന വേറിട്ട പേര്: ഡോ. വി.വി. വേലുക്കുട്ടി അരയൻ വൈദ്യർ,

കൊല്ലം ജില്ലയിൽ കരുനാഗപ്പള്ളി താലൂക്കിലെ തീരദേശഗ്രാമമായ ആലപ്പാട്ട് 1894 മാർച്ച് 11-ന് ജനനം. വേലായുധൻ വെളുത്ത കുഞ്ഞമ്മ എന്നിവർ മാതാപിതാക്കൾ. കുട്ടിക്കാലത്തു തന്നെ മാതാവ് മരിച്ചതിനാൽ മാതുലന്റെ സംരക്ഷണത്തിലാണ് വളർന്നത്. കുടുംബ വിദ്യാലയങ്ങളിലെ പഠനത്തിനു ശേഷം മദിരാശിയിൽ നിന്ന് അലോപ്പതിയിലും കൊൽക്കത്തയിൽ നിന്ന് ഹോമിയോപ്പതിയിലും ബിരുദം നേടി. തുടർന്ന് നിയമ വിദ്യാഭ്യാസവും സമുദ്രശാസ്ത്രം സംബന്ധിച്ച് ശാസ്ത്രീയ പരിശീലനവും ആർജിച്ചു. നേരത്തെത്തന്നെ ആയുർ വേദവും സംസ്കൃതവും അഭ്യസിച്ചിരുന്നു. മലയാളം, ഇംഗ്ലീഷ് ഭാഷകളിലും സാഹിത്യത്തിലും അവഗാഹം നേടി. എന്നാൽ സാമൂഹിക രംഗത്ത് പ്രവർത്തിക്കാനാണ് ഇഷ്ടപ്പെട്ടത്. സ്വദേശത്ത് പ്രതിഫലം വാങ്ങാതെ ചികിത്സയും നടത്തി.

14-ാം വയസ്സിൽ ചെറിയഴീക്കലിൽ വിജ്ഞാന സന്ദായിനി എന്ന ഗ്രന്ഥശാലയുടെ സ്ഥാപനത്തോടെയാണ് വേലുക്കുട്ടി അരയന്റെ പൊതുപ്രവർത്തനം ആരംഭിച്ചത്. 1916-ൽ അരയ വംശ പരിപാലനയോഗം സ്ഥാപിച്ച് ജനറൽ സെക്രട്ടറിയുടെ ചുമതല വഹിച്ചു. അനുബന്ധമായി സമസ്തകേരളീയ അരയമഹാജനയോഗവും സംഘടിപ്പിച്ചു.