విజయహో విక్రమ్

జాబిలిపై విజయవంతంగా అడుగుపెట్టిన చంద్రయాన్-3

జాబిలిపై విజయవంతంగా అడుగుపెట్టిన చంద్రయాన్-3

15 ఏళ్ల క్రితం చంద్రుడిపై నీరుందని మొదటి జాబిల్లి యాత్ర చంద్రయాన్ 1 తోనే గుర్తించిన భారత్.. చంద్రయాన్ 3 ప్రయోగంతో జాబిల్లి దక్షిణ ధ్రువంపై దిగిన తొలి దేశంగా నిలిచింది. చంద్రయాన్ 3 తో జాబిల్లిపై ఎవరూ వెళ్లని దారుల్లో వెళ్లి.. ఎవరూ చూడని దక్షిణ ధృవాన్ని ప్రపంచానికి చూపించింది. బుధవారం సాయంత్రం 6.03 గంటలకు విక్రమ్ ల్యాండర్ జాబిల్లిపై దిగ్విజయంగా కాలుమోపి..భారత వైజ్ఞానిక సత్తాను ప్రపంచానికి చాటిచెప్పింది.

• దక్షిణ ధృవంపై దిగిన తొలిదేశంగా నిలిచిన భారత్ 

• 14 రోజుల పాటు పరిశోధనలు చేయనున్న రోవర్

• సురక్షిత ల్యాండింగ్ చేసిన నాలుగో దేశంగా రికార్డు

• ఎలాంటి అడ్డంకులు లేకుండా సాఫ్ట్ ల్యాండింగ్

• ఇస్రో శాస్త్రవేత్తల అంతులేని ఆనందోత్సాహాలు 

• ప్రధాని మోడీ సహా పలువురి అభినందనలు

చంద్రయాన్ 3 స్పేస్ క్రాఫ్ట్ చంద్రుడి నేలపైన సాఫ్ట్ ల్యాండింగ్ విజయవంతం అయింది. 40 రోజులుగా ఎదురు చూస్తున్న కోట్లాది కళ్లు ఆ ఘట్టాన్ని చూసి ఆనందంతో సంబరపడిపోయాయి. సాఫ్ట్ ల్యాండింగ్ అయిన క్షణంలో ఒక్కసారిగా శాస్త్రవేత్తల ముఖంలో ఆనందం వెల్లివిరిసింది. ఒకరికొకరు అభినందనలు తెలుపుకున్నారు.అంతకుముందు అరగంట పాటు దేశమంతా అందరూ టీవీలు, ఫోన్ల తెరలకు అతుక్కుపోయి ఉత్కంఠగా సాఫ్ట్ ల్యాండింగ్ ప్రక్రియను తిలకించారు. ఈ ప్రయోగం విజయవంతం అవడంతో సౌత్ పోల్ను తాకిన ప్రపంచంలోనే మొట్టమొదటి దేశంగా భారత్ అవతరించింది.చంద్రుడిపైకి చేరిన నాలుగో దేశంగా ఇండియా నిలిచింది.