ఎస్ఆర్ఆర్ డెవలపర్స్ భారీ మోసం

• సాయివనం ప్రాజెక్ట్ లో ఫామ్ హౌజ్ పేరుతో టోకరా.! • రూ. 28లక్షలకే 242 స్క్వేర్యర్డ్ అంటూ మోసం

• ప్రతి నెల రూ. 7 వేలు అద్దె చెల్లిస్తామంటూ గాలం

• భూములు కట్టబెట్టేందుకు మాయమాటలు

• రియల్ ఎస్టేట్ సంస్థ బాగోతం బట్టబయలు

• అమాయకులను బోల్తాకొట్టిస్తున్న ఎస్ఆర్ఆర్ సంస్థ

హైదరాబాద్ 16 జూలై (ఆదాబ్ హైదరాబాద్): 'మేడిపండు చూడు మేలిమై ఉండు పొట్టవిప్పి చూడు పురుగులుండు' అనే పద్యంలో కవి చెప్పినట్టు రియల్ భూమ్ తో ప్రజలు ఎంతో మోసపోతున్నారు. డబ్బు సంపాదనే లక్ష్యంగా రియల్ ఎస్టేట్ దందా చేస్తున్న కొందరు వ్యాపారులు ఎప్పుడూ.. జనాన్ని ఎట్లా మోసపుచ్చాలనే ఆలోచన చేస్తుంటారు. తెలంగాణ రాష్ట్రంలో పదేళ్లుగా రియల్ ఎస్టేట్ బిజినెస్ చేస్తూ అనేక మంది కోట్లు సంపాదించారు. పది జిల్లాలను కాస్త అమాంతం మూడు రెట్లు చేయడం, రెవెన్యూ డివిజన్ లు, మండలాలు పెంచిన అప్పటి సీఎం కేసీఆర్ పుణ్యమా అని రాష్ట్రంలో భూములకు రెక్కలొచ్చాయి. దీన్నే ఆసరగా చేసుకున్న కొందరు రాజకీయ నాయకులు కోట్లు వెనకేసుకున్నారు.