மாஜி அமைச்சர் வைத்திலிங்கம் மீது வழக்கு

அதிமுக ஆட்சியில் அடுக்குமாடி குடியிருப்பு கட்ட ₹27 கோடி லஞ்சம்

• 2 மகன்கள் உள்பட 11 பேர் மீதும் குற்றச்சாட்டு

• லஞ்ச ஒழிப்புத் துறை அதிரடி

அதிமுக ஆட்சியில் சென்னயில் அடுக்குமாடி குடியிருப்பு கட்ட ரூ.27 கோடி லஞ்சம் வாங்கியதாக முன்னாள் அமைச்சர் வைத்திலிங்கம், அவரது 2 மகன்கள் உள்பட 11 பேர் மீது தஞ்சாவூர் லஞ்ச ஒழிப்பு துறை போலீசார் வழக்குப்பதிவு செய்துள்ளனர்.

கடந்த 2011-16ம் ஆண்டு கால கட்டத்தில் ஜெயலலிதா தலைமையிலான அதிமுக அமைச்சரவையில் வீட்டு வசதி துறை அமைச்சராக இருந்தவர் வைத்திலிங்கம். ஜெயலலிதா காலத்தில் அதிமுகவில் செல்வாக்குடன் இருந்தவர். இப்போது தஞ்சாவூர் மாவட்டம் ஒரத்தநாடு தொகுதி எம்எல்ஏவாக உள்ளார். அதிமுகவில் இருந்து விலகி, ஓ.பன்னீர்செல்வம் அணியில் செயல்படுகிறார். வைத்திலிங்கத்தின் சொந்த ஊர் தஞ்சை மாவட்டம் ஒரத்தநாடு தாலுகா தெலுகன்குடிக்காடு கிராமம். இவரது பெற்றோர் ரெங்கசாமி மற்றும் முத்தம்மாள். இருவரும் இறந்து விட்டனர். வைத்திலிங்கம் நடுத்தர குடும்பத்தை சேர்ந்தவர். விவசாயத்தின் மூலம் மட்டுமே வருமானம் பெற்றவர். இவரது மனைவி தங்கம், இவர்களுக்கு மூன்று மகன்கள் மற்றும் ஒரு மகள் உள்ளனர். மூத்த மகன் பிரபு. இவர் பிருந்தா என்பவரை திருமணம் செய்து கொண்டார். இளைய மகன்கள் ஆனந்தபிரபு மற்றும் சண்முகபிரபு. இருவரும் டாக்டர்கள். மகள் பிரதீபா. ஒரத்தநாடு அருகே புதூரை சேர்ந்த டாக்டர் கார்த்திகேயனை திருமணம் செய்துள்ளார்.