புழல், சோழவரம் ஏரிகளுக்கு தொடர்ந்து நீர்வரத்து அதிகரிப்பு

அதிகபட்சமாக ஆவடியில் 13 செ.மீ. மழை பதிவு

சுற்றுவட்டார பகுதிகளில் கெட்டித்தீர்த்த கனமழையால் புழல், சோழவரம் ஏரிகளுக்கு நீர்வரத்து அதிகரித்துள்ளது. இதில் அதிகபட்சமாக ஆவடி மற்றும் அயப்பாக்கம் பகுதியில் 13 செமீ மழை கொட்டித்தீர்த்துள்ளது.

திருவள்ளூர் மாவட்டம் திருத்தணி, திருவாலாங்காடு பள்ளிப்பட்டு மற்றும் ஆர்கே பேட்டை சுற்றுவட்டார பகுதிகளில் கடந்த சில நாட்களாக பகல் நேரங்களில் வெயிலின் தாக்கம் சற்று அதிகரித்தாலும், கடந்த 3 நாட்களாக இரவு நேரங்களில் லேசான மற்றும் மிதமான மழை பெய்து வருகிறது. இந்நிலையில், நேற்று முன்தினம் மாலை 7 மணி முதல் திருத்தணி, திருவாலங்காடு பகுதிகளில் இரவு முழுவதும் மழை பெய்தது. இதனால், தாழ்வான பகுதிகளில் வெள்ளப்பெருக்கு ஏற்பட்டதால், வாகன ஓட்டிகள் மற்றும் குடியிருப்போர் அவதி அடைந்தனர். திருத்தணியில் ம.பொ‌சி. சாலை, பழைய பஜார் தெரு, மருத்துவமனை சாலை, காந்தி ரோடு ஆகிய பகுதிகளில் மழை நீர் மற்றும் கழிவு நீர் சாலைகளில் தேங்கி நின்றதால் அங்கு வாகன சேவை பாதிக்கப்பட்டது. இரவு நேரங்களில் தொடர்ந்து மழை பெய்து வருகிறது. நிலத்தடி நீர்மட்டம் படிப்படியாக உயர்ந்து வருவதால், விவசாயிகள் மற்றும் பொதுமக்கள் மகிழ்ச்சி அடைந்துள்ளனர். இதேபோல் பள்ளிப்பட்டு, பொதட்டூர்பேட்டை, ஆர்.கே.பேட்டை பகுதியிலும் சுமார் 1 மணி நேரம் பெய்த மழையின் காரணமாக மின்சாரம் தடைப்பட்டது. நேற்று முன்தினம் இரவு முதல் நேற்று அதிகாலை வரை திருவாலங்காட்டில் 11.3 செ.மீ மழை பதிவானது.

இதேபோல் திருத்தணியில் 56 மி.மீ, ஆர்கே பேட்டையில் 12 மி.மீ., பள்ளிப்பட்டில் 10 மி.மீ. மழை பதிவானது.