அமெரிக்க அதிபர் தேர்தலுக்குப் பின் காஸா, உக்ரைன்...

அமெரிக்க அதிபர் தேர்தல் வாக்குப்பதிவு விறுவிறுப்பாக நடந்துகொண்டிருக்கிறது.

- நாகா

மற்ற நாடுகளில் நடைபெறும் தேர்தல்களைப் போல் இதை சாதாரணமாகப் பார்க்க முடியாது. காரணம், 'உலகின் போலீஸ்காரர்' என்று அழைக்கப்படும் அந்த நாட்டின் தலைமைப் பதவியில் யார் அமர்கிறார்கள் என்பதும், அவர் என்னென்ன முடிவுகள் எடுக்கிறார் என்பதும் சர்வதேச அளவில் நடைபெறும் போர்கள் உள்ளிட்ட பிரச்னைகளில் தாக்கத்தை ஏற்படுத்தும்.

அந்த வகையில், தற்போது காஸா மற்றும் லெபனானில் இஸ்ரேல் நடத்திவரும் போர், உக்ரைன் மீதான ரஷிய படையெடுப்பு ஆகியவற்றின் மீது அமெரிக்க அதிபர் தேர்தல் முடிவுகள் என்ன பாதிப்பை ஏற்படுத்தும்? காஸா போர்: இந்த விவகாரத்தில் டொனால்ட் டிரம்ப், கமலா ஹாரிஸ் ஆகிய இருவருமே இஸ்ரேலுக்கு தங்களது தீவிர ஆதரவை வெளிப்படுத்திவருகின்றனர். இதன் காரணமாக, இவர்களில் யார் வெற்றி பெற்றாலும் காஸா போர் அவ்வளவு விரைவில் முடிவுக்கு வந்துவிடாது என்றுதான் அரபு உலகம் கருதுகிறது. அத்துடன், காஸா போரை முடிவுக்குக் கொண்டுவருவதற்கான தீர்வு இருவரிடமே இல்லை.

இருந்தாலும், அடுத்த அதிபராக டிரம்ப் பொறுப்பேற்றால் இஸ்ரேலுக்கான அமெரிக்க ஆதரவு மேலும் அதிகரிக்கும் என்று கருதப்படுகிறது. ஏற்கெனவே, தனது முந்தைய ஆட்சியின்போது சர்ச்சைக்குரிய ஜெருசலேத்தில் இஸ்ரேலுக்கான தூதரகத்தைத் திறந்து பாலஸ்தீனர்களின் கோபத்துக்கு டிரம்ப் ஆளானார். இஸ்ரேலுடன் நீண்ட காலமாக பகை பாராட்டிவந்த அரபு நாடுகளை அழைத்துவந்து அந்த நாட்டுடன் உறவு ஏற்பட வழிசெய்தார். ஒபாமா காலத்தில் கொண்டுவரப்பட்ட - இஸ்ரேல் கடுமையாக எதிர்த்துவந்த - ஈரான் அணுசக்தி ஒப்பந்தத்தை ரத்து செய்தார்.