அண்ணல் காந்தியுடன் ஓர் அரிய சந்திப்பு

மின்சாரம், வானொலி, தொலைக்காட்சி, தொலைபேசி போன்ற நவீன வசதிகள் அதிகம் பரவாத காலத்தில், ஒவ்வொரு இந்தியனின் உள்ளத்திலும் காந்தி இடம் பிடித்தார். போரில்லா உலகத்தை உருவாக்கப் பாடுபட்டார். 'மகாத்மா' என்று உலக மக்களால் நேசிக்கப்பட்டார்.

- கட்டுரையாளர்: காந்தியவாதி.

நான் 1948 முதல் 1952 வரை கோவில்பட்டி வ.உ.சி. உயர்நிலைப் பள்ளியில் படித்துக் கொண்டிருந்தேன். 1948-ஆம் ஆண்டு ஜனவரி 30-ஆம் நாள், காந்தி மகாத்மா சுட்டுக் கொல்லப்பட்டார் என்ற செய்தி பரவியது. அடுத்த நாள் மாலையில் பள்ளியின் பெரிய அரங்கில் ஒரு இரங்கல் கூட்டம் நடைபெற்றது. பிரார்த்தனைப் பாடலுக்குப் பின்பு மாவட்ட நீதிபதி நெஞ்சுருக்கப் பேசினார். அது சமயம் என் அருகில் நின்றிருந்த தமிழ் ஆசிரியர், சீனா சானா (சி.ச.) என்று மாணவர்களால் அன்போடு அழைக்கப்படும் சி.சங்கரலிங்கம் செட்டியார் நான் கண்கலங்கி அழுது கொண்டிருப்பதைப் பார்த்துவிட்டார்!

அவர் என் அருகில் வந்து "பிச்சை! ஏன் அழுகிறாய்? மகாத்மா மறைந்துவிட்டார் என்பதற்காகவா?" எனக் கேட்டார். "இல்லை" என்றேன் நான்!

"பின் எதற்காக அழுகிறாய்?" என வினவினார்.

"நான் மகாத்மாவை இன்று வரை பார்க்கவில்லையே! இனியும் அவரைப் பார்க்க முடியாதே! அதை நினைத்துத்தான் அழுகிறேன்" என்றேன்.

அரசு அதிகாரம் எதுவும் இல்லாமலே, மக்களின் மனத்தில் என்றும் அழியா இடம் பிடித்தவர் அண்ணல் காந்தி அடிகள் மட்டுமே! சத்தியம், அகிம்சை ஆகிய வழிகளை நவீன அரசியலிலும் கடைப்பிடிக்கலாம் என்று போதித்தவர். அதன்படியே வாழ்ந்து காட்டியவர் காந்தி. அவருடைய வாழ்க்கையே ஒரு உபதேசம்.

மின்சாரம், வானொலி, தொலைக்காட்சி, தொலைபேசி போன்ற நவீன வசதிகள் அதிகம் பரவாத காலத்தில், ஒவ்வொரு இந்தியனின் உள்ளத்திலும் இடம்பிடித்தார். போரில்லா உலகத்தை உருவாக்கப் பாடுபட்டார். 'மகாத்மா' என்று உலக மக்களால் நேசிக்கப்பட்டார். ஆனால் அவரோ தன்னை 'ஒரு சாதாரண மனிதன்' என்றே சொன்னார். ஒரு முன்மாதிரி மனிதனாக வாழ்ந்து மறைந்த மனிதப் புனிதர் அவர்.