இந்தியாவிலிருந்து ஹசீனாவை நாடு கடத்த இன்டர்போல் உதவியை நாடுகிறது வங்கதேசம்

இந்தியாவில் தஞ்சமடைந்துள்ள வங்கதேச முன்னாள் பிரதமர் ஷேக் ஹசீனாவை நாடு கடத்தி அழைத்து வர 'இன்டர்போல்' உதவியை அந்நாட்டின் இடைக்கால அரசு நாடுகிறது.

அண்டை நாடான வங்கதேசத்தில் அரசுப் பணிகளில் சுதந்திர போராட்ட தியாகிகளின் வாரிசுகளுக்கு வழங்கப்பட்ட இடஒதுக்கீட்டைக் கண்டித்து மாணவர்கள் போராட்டம் நடத்தினர். இதில் வன்முறை ஏற்பட்டு, நூற்றுக்கணக்கானோர் கொல்லப்பட்டனர். கடந்த ஆகஸ்ட் மாதம் 5-ஆம் தேதி போராட்டம் உச்சக்கட்டத்தை எட்டிய நிலையில், அப்போது பிரதமராக இருந்த அவாமி லீக் கட்சியின் தலைவர் ஷேக் ஹசீனா, பதவியை ராஜினாமா செய்துவிட்டு இந்தியாவுக்குத் தப்பினார்.

மேற்கத்திய நாடுகளில் அனுமதி மறுக்கப்பட்டதால், ஹசீனா இந்தியாவிலேயே தொடர்ந்து தங்கியுள்ளார். மனிதாபிமானம் மற்றும் நட்பு அடிப்படையில் அவருக்கு இந்தியா அடைக்கலம் அளித்துள்ளது.