தமிழகத்தில் கூட்டணி அரசு சாத்தியமா?

மக்களாட்சியில் ஏதேனும் ஓர் அரசியல் கட்சியின் மேலாதிக்கம் இல்லாமல், பல அரசியல் கட்சிகள் ஒன்று சேர்ந்து அமைப்பது கூட்டணி அரசு. எந்தவோர் அரசியல் கட்சிக்கும் அறுதிப்பெரும்பான்மை அமையாத தருணங்களில் அமைவதும்கூட கூட்டணி அரசுதான்.

- முனைவர் வைகைச்செல்வன்

தேர்தல் கூட்டணி என்பது கொள்கை சார்ந்தது அல்ல. பொது எதிரியை வீழ்த்துவதற்குப் பல்வேறு கொள்கைகளை உடைய கட்சியினர் ஒன்றிணைவது தான் தேர்தல் கூட்டணி. அனைத்து கட்சிகளுக்கும் ஒரு கொள்கை உண்டு. தேர்தல் நேரத்தில் மட்டும் கொள்கைகளை ஒதுக்கி வைத்து விட்டு கூட்டணி வைத்துக் கொள்கின்றனர்.

ஆகவேதான், கொள்கை வேறு, கூட்டணி வேறு என்று சொல்லிக்கொள்ள முடிகிறது. அதேசமயத்தில் ஆட்சி அதிகாரம் என்பது கொள்கையைவிட முக்கியம் என்று எல்லா கட்சிகளும் கருதுகின்றன. தமிழக அரசியல் வரலாற்றில் 1967-இல் ராஜாஜியும், அண்ணாவும் ஒன்றிணைந்தார்கள். அது ஒரு மிகப் பெரிய திருப்பத்தை அந்தத் தேர்தலில் ஏற்படுத்தியது. ஆட்சியைப் பிடிப்பதற்குப் புதிய உத்தியைத் தமிழகம் அப்போது கண்டறிந்தது.

அதன்பின்னர், காலமெல்லாம் எதிர்த்தவர்களுடன் கைகோத்துக் கொண்டு பல்வேறு கட்சியினர் பல்வேறு தேர்தல் களமாடியிருக்கிறார்கள்.

காங்கிரஸை வீழ்த்திய திமுக, அன்றைய பிரதமர் இந்திரா காந்தியைக் கடுமையாக எதிர்த்தது. 'நேருவின் மகளே வருக, நிலையான ஆட்சி தருக' என்று திமுகவும் காங்கிரஸும் 1980-இல் கூட்டணி வைத்துக் கொண்டன. எதிரெதிர் துருவங்கள் எப்படி ஒரே அணியில் இணைய முடியும் என்ற விவாதப் பொருளுக்கு தேர்தல் அரசியலில் இவையெல்லாம் சாத்தியம் என்று ஒரு புதிய வியாக்கியானம் தரப்பட்டது.

திமுகவின் ஆட்சியை டிஸ்மிஸ் செய்து, மிசாவில் கைது செய்த இந்திரா காந்தியுடன் எவ்வாறு திமுக கூட்டணி வைத்துக் கொண்டதோ, அதைப்போல மதவாத சக்தி என்று இப்போது சொல்கிற பாரதிய ஜனதா கட்சியுடன் திமுக தேர்தல் கூட்டணி வைத்துக் கொண்டதும், அவர்களோடு மத்திய ஆட்சியில் அங்கம் வகித்ததும் கடந்த கால வரலாறுகள்.

திமுகவின் வாரிசு அரசியலை எதிர்த்துக் கட்சி தொடங்கிய வைகோ இன்று திமுகவை ஆதரிப்பதிலும், அதே வாரிசு அரசியலை முன்னிலைப்படுத்துவதிலும் கொள்கை நிற பேதங்களைப் பார்க்கலாம்.

“கொள்கை என்பது இடுப்பில் கட்டும் வேட்டி, பதவி என்பது மேலே அணியும் துண்டு. பதவிக்காக இடுப்பில் கட்டிய வேட்டியை நாம் இழக்கக் கூடாது” என்று சொன்னார் அண்ணா. இன்று தேர்தல் கால அரசியலில் அது மறந்துவிட்டது.