விஜய் கூட்டிய மாநாடும் விரியும் சிந்தனைகளும்

நடிகர் விஜயின் மாநாட்டைப் பலர் பாராட்டலாம்; சிலர் பழித்துரைக்கலாம்; எதிர்க்கும் சக்திகள் எள்ளி நகையாடலாம்; போற்றும் சக்திகள் புகழ் பாடலாம்; எது எப்படி இருப்பினும் அந்த மாநாடு பேசுபொருளாகிவிட்டது என்பதில் மாற்றமில்லை. அவர் மீது உலகத்தின் கவனம் படியத் தொடங்கிவிட்டது என்பது நூறு விழுக்காடு உண்மை.

- வீரபாண்டியன்

தமிழகப் பொது வாழ்விற்கு ஒரு மக்கள் தலைமை தேவைப்படுகிறது. மக்கள் தலைவராக விளங்கிய எம்.ஜி.ஆர். அவர்களுக்குப் பிறகு அந்த இடத்தை இன்னும் அதிகமான வாக்கு எண்ணிக்கையோடு நிரப்பினார் செல்வி ஜெயலலிதா. அதே நேரத்தில் தொடர்ந்து தனது இருப்பிடத்தைத் தக்க வைத்துக் கொண்டே வந்தார் கருணாநிதி.

அண்மைக்காலத்தில் இந்த மூன்று பெரும் தலைவர்களுக்குப் பிறகு மகத்தான மக்கள் சக்தியாக விஸ்வரூபம் எடுத்து நிற்பதற்குமான தலைவர்கள் இல்லை என்பதை நாம் ஒப்புக் கொண்டே ஆக வேண்டும். அதிகாரிகள் வரலாம்; நிர்வாகிகள் வரலாம்; அரசியல் ஆரூடம் சொல்லும் அறிஞர் பெருமக்கள் வரலாம்; ஆனால் 'கடைக்கோடி மனிதனுக்கும் கடைத்தேற்றம் தருவான்' என்று நம்பிக்கை அளிக்கக்கூடிய ஒரு தலைவன் வருவது மிக மிக முக்கியமானது. ஜனநாயகம் அதையே விரும்புகிறது.

எல்லாத் தரப்பு மக்களும் ஏற்றுக் கொள்ளக் கூடிய மாமனிதனாக ஒருவன் வளர வேண்டும் என்றால் அவனுக்குள் ஒரு மகத்தான சக்தி இருக்க வேண்டும். அந்தச் சக்தி என்ன என்பதை உணர்ந்து கொள்கிறவர்களே தன்னை அதற்கேற்பச் செப்பம் செய்து கொள்ள முடியும். அந்த நிலை இன்றைக்குத் தமிழகத்தில் இல்லை என்பதை நாம் நெஞ்சுரத்தோடு ஏற்றுக் கொள்ள வேண்டும்.

மக்களுக்காக... மக்களால்... மக்களோடு...! என்று மக்களாட்சியை வரையறுப்பார் அமெரிக்க அதிபராக இருந்த ஆபிரகாம் லிங்கன். மக்களிடம் செல்வம் முக்கியமில்லை. உங்களுக்கு எதிரே இருப்பது இரண்டு பெரிய திராவிட இயக்கங்கள் என்பதை நீங்கள் நினைவில் பதிக்க வேண்டும். அவர்கள் முக்கால் நூற்றாண்டைக் கண்டுவிட்ட முழு நேர அரசியல்வாதிகள். கிராமம் கிராமமாக ஊடுருவிக் கிடக்கிற பெரும்படை. தத்துவார்த்த தெளிவு - ஆழமான வாசிப்பு - அயராத உழைப்பு - சமரசமற்ற போர்க்குணம் இவற்றோடு நீங்கள் உங்கள் அரசியல் பகைவர்களைச் சந்தித்தாக வேண்டும்.

நாங்கள்தான் ஊரை வாழ வைக்க வந்த உண்மைத் தியாகிகள்...! என்று அவர்கள் மக்களிடம் தங்களைத் தூக்கி நிறுத்தி இருக்கிறார்கள். இந்தக் கட்டமைப்பை நீங்கள் ஊடறுத்துப் பாய வேண்டும். நாங்களும் மக்கள் தொண்டாற்ற வந்த மகத்தான மனிதர்களே.! என்று நீங்கள் உங்களை மெய்ப்பித்தாக வேண்டும்.

பெருந்தலைவர் காமராஜர் ஒரு முறை சொன்னார் - என்னை எல்லோரும் 'படிக்காதவன்; பள்ளிக்கூடம் போகாதவன்' என்று பேசுகிறார்கள். எனக்கு எந்த ஆறு