அரசுப் பேருந்துகளில் தினமும் 57 லட்சம் மகளிர் கட்டணமின்றி பயணம்: தமிழக அரசு

சென்னை, நவ. 23: மகளிர் விடியல் பயணம் திட்டத்தின் கீழ், அரசுப் போக்குவரத்துக் கழகப் பேருந்துகளில் நாள்தோறும் 57 லட்சம் மகளிர் கட்டணமில்லாமல் பயணம் மேற்கொள்வதாக தமிழக அரசின் சார்பில் தெரிவிக்கப்பட்டுள்ளது.

இது தொடர்பாக தமிழக அரசின் சார்பில் சனிக்கிழமை வெளியிடப்பட்ட செய்திக்குறிப்பு: மகளிர் விடியல் பயணத் திட்டம் மகளிர் வாழ்வில் விளக்கேற்றும் திட்டமாக அனைவராலும் பாராட்டப்படுகிறது. இந்தத் திட்டத்தால் ஒவ்வொரு பெண்ணும் மாதாந்திரச் செலவில் ரூ. 888 சேமிக்கின்றனர் என்பது தெரியவந்துள்ளது.

2024 அக்டோபர் 31-ஆம் தேதி வரை ரூ. 9,143.70 கோடி அரசு செலவில் 570.86 கோடி பயண முறைகள் மகளிர் கட்டணமில்லாமல் பயணம் மேற்கொண்டுள்ளனர்.

ஒரு நாளில் 57.07 லட்சம் மகளிர் பயணம் மேற்கொள்கின்றனர்.