விவசாயிகளுக்கான பாதிப்புகள்: உச்சநீதிமன்றக் குழுவின் இடைக்கால அறிக்கை தாக்கல்

புது தில்லி, நவ. 23: கடன் அதிகரிப்பு, விளைச்சல் தேக்கம், போதிய சந்தை நடைமுறை இல்லாதது, விலைவாசி உயர்வு உள்ளிட்ட பல்வேறு பிரச்னைகளை விவசாயிகள் சந்தித்து வருவதாக உச்சநீதிமன்றம் சார்பில் அமைக்கப்பட்ட உயர்நிலைக் குழு தனது இடைக்கால அறிக்கையில் குறிப்பிட்டுள்ளது.

மேலும், விளைச்சல் பாதிப்பு காரணமாக கடன் தொகையை திரும்பச் செலுத்த முடியாதது உள்ளிட்ட பல்வேறு காரணங்களால் கடந்த 1995-ஆம் ஆண்டு முதல் 4 லட்சத்துக்கும் அதிகமான விவசாயிகள், விவசாயத் தொழிலாளர்கள் தற்கொலை செய்து கொண்டிருப்பதாகவும் உயர்நிலைக் குழு தனது அறிக்கையில் குறிப்பிட்டுள்ளது.

விளைபொருள்களுக்கான குறைந்தபட்ச ஆதரவு விலைக்கு (எம்எஸ்பி) சட்டபூர்வ அங்கீகாரம் உள்ளிட்ட பல்வேறு கோரிக்கைகளை வலியுறுத்தி பஞ்சாப், ஹரியாணா மாநில விவசாயிகள் தொடர் போராட்டங்களில் ஈடுபட்டு வருகின்றனர்.

மத்திய அரசு தங்களின் கோரிக்கைகளை ஏற்காததைத் தொடர்ந்து, தில்லி செல்லும் போராட்டத்துக்கு சம்யுக்த கிசான் மோர்ச்சா மற்றும் கிசான் மஸ்தூர் மோர்ச்சா ஆகிய விவசாய சங்கங்கள் கடந்த பிப்ரவரியில் அழைப்பு விடுத்தன. அந்த அழைப்பை ஏற்று தில்லி செல்லும் போராட்டத்தை கடந்த பிப்ரவரி 13-ஆம் தேதி விவசாயிகள் மேற்கொண்டனர். அவர்களைத் தடுத்து நிறுத்தும்விதமாக அம்பாலா - தில்லி தேசிய நெடுஞ்சாலையில் தில்லியின் எல்லைப் பகுதியில் தற்காலிக தடுப்புகளை ஹரியாணா அரசு ஏற்படுத்தி, போலீஸாரும் குவிக்கப்பட்டனர்.