நெதன்யாகுக்கு மரண தண்டனை விதிக்க வேண்டும்!

டெஹ்ரான், நவ. 25: இஸ்ரேல் பிரதமர் பெஞ்சமின் நெதன்யாகுக்கு எதிராக சர்வதேச குற்றவியல் நீதிமன்றம் கைது உத்தரவு பிறப்பித்ததற்குப் பதிலாக, அவருக்கு மரண தண்டனை விதித்திருக்க வேண்டும் என்று ஈரான் தலைமை மத குரு அயதுல்லா கமேனி வலியுறுத்தியுள்ளார்.

தலைநகர் டெஹ்ரானில் திங்கள்கிழமை நடைபெற்ற நிகழ்ச்சியொன்றில் பசீஜ் ஆயுதக் குழு உறுப்பினர்களிடையே இது குறித்து அவர் பேசியதாவது:

போர்க் குற்றத்தில் ஈடுபட்டதற்காக இஸ்ரேல் பிரதமர் பெஞ்சமின் நெதன்யாகு, அவரின் முன்னாள் பாதுகாப்புத் துறை அமைச்சர் யோவாவ் கலான்ட் ஆகியோருக்கு எதிராக சர்வதேச குற்றவியல் நீதிமன்றம் கைது உத்தரவு பிறப்பித்துள்ளது.

ஆனால், அவர்கள் செய்த குற்றத்துக்கு அந்த தண்டனை போதாது. அந்த இருவருக்கும் நீதிமன்றம் மரண தண்டனை விதித்திருக்க வேண்டும் என்றார் அவர்.

இஸ்ரேலுடன் போரில் ஈடுபட்டுவரும் ஹமாஸ், ஹிஸ்புல்லா ஆகிய இரு அமைப்புகளையுமே உருவாக்கி வளர்த்துவரும் ஈரானின் உச்சபட்ச அதிகாரம் மிக்க தலைவரான கமேனி இவ்வாறு கூறியுள்ளது பரபரப்பை ஏற்படுத்தியுள்ளது.

கடந்த ஆண்டு அக்டோபர் 7-ஆம் தேதி இஸ்ரேலுக்குள் நுழைந்து ஹமாஸ் அமைப்பினர் நடத்திய தாக்குதலில் சுமார் 1,200 பேர் உயிரிழந்தனர்; 200-க்கும் மேற்பட்டவர்கள் பிணைக் கைதிகளாக கடத்திச் செல்லப்பட்டனர்.