அதானியைப் பாதுகாக்கும் மத்திய அரசு: ராகுல் குற்றச்சாட்டு

 ‘நாட்டில் சிறிய குற்றச்சாட்டுகளின்பேரில் நூற்றுக்கணக்கான நபா்கள் கைது செய்யப்பட்டு சிறையில் உள்ளனா்; ஆனால், அமெரிக்க நீதிமன்றத்தில் ஆயிரக்கணக்கான கோடி லஞ்ச குற்றச்சாட்டு சுமத்தப்பட்ட தொழிலதிபா் கெளதம் அதானி இன்னும் கைது செய்யப்படாதது ஏன்?’ என்று எதிா்க்கட்சித் தலைவா் ராகுல் காந்தி கேள்வியெழுப்பினாா்.

அதானியை மத்திய அரசு பாதுகாக்கிறது என்றும் அவா் குற்றஞ்சாட்டினாா்.

நாட்டில் கடந்த 2020-2024 காலகட்டத்தில் சூரிய மின்சார கொள்முதல் ஒப்பந்தங்களை மேற்கொள்ள சில மாநிலங்களின் அரசு அதிகாரிகளுக்கு 265 மில்லியன் டாலா் (சுமாா் ரூ.2,200 கோடி) லஞ்சம் வழங்கியதாக, தொழிலதிபா் கெளதம் அதானி, அவரது உறவினா் சாகா் அதானி உள்ளிட்டோா் மீது அமெரிக்க நீதிமன்றத்தில் அந்நாட்டு அரசு தரப்பால் அண்மையில் குற்றஞ்சாட்டப்பட்டது.

இந்திய அரசியலில் புதிய புயலை கிளப்பியுள்ள இந்த விவகாரம், கடந்த திங்கள்கிழமை தொடங்கிய நாடாளுமன்ற குளிா்கால கூட்டத் தொடரில் எதிரொலித்து வருகிறது.

அனைத்து அலுவல்களையும் ஒத்திவைத்துவிட்டு, அதானி விவகாரம் குறித்து விவாதிக்க வேண்டுமென காங்கிரஸ் உள்ளிட்ட எதிா்க்கட்சி உறுப்பினா்கள் அமளியில் ஈடுபட்டதால், இரு அவைகளும் புதன்கிழமை நாள் முழுக்க ஒத்திவைக்கப்பட்டன.

இந்தச் சூழலில், நாடாளுமன்றத்துக்கு வெளியே செய்தியாளா்களுக்கு பேட்டியளித்த மக்களவை எதிா்க்கட்சித் தலைவா் ராகுல் காந்தி, அதானியை மத்திய அரசு பாதுகாப்பதாக குற்றம்சாட்டினாா்.

அவா் மேலும் கூறுகையில், ‘நாட்டில் சிறிய குற்றச்சாட்டுகளின்பேரில் நூற்றுக்கணக்கான நபா்கள் கைது செய்யப்பட்டு, சிறையில் அடைக்கப்பட்டுள்ளனா். ஆனால், ஆயிரக்கணக்கான கோடி லஞ்ச குற்றச்சாட்டுக்கு உள்ளான அதானி இன்னும் கைது செய்யப்படாதது ஏன்?’ என்று அவா் கேள்வியெழுப்பினாா்.