பழங்குடியினர் வீடு கட்ட கூடுதல் நிதி

மத்திய அரசிடம் வலியுறுத்தி இருப்பதாக குடியரசுத் தலைவர் தகவல்

உதகை, நவ. 29: பழங்குடியினத்தவர் வீடு கட்ட கூடுதல் நிதி ஒதுக்கீடு செய்யும்படி மத்திய அரசிடம் வலியுறுத்தி இருப்பதாக குடியரசுத் தலைவர் திரௌபதி முர்மு கூறியுள்ளார்.

தமிழ்நாட்டுக்கு நான்கு நாள் பயணமாக கடந்த 27-ஆம் தேதி வந்த குடியரசுத் தலைவர் உதகை ராஜ்பவனில் (ஆளுநர் மாளிகை) தங்கியுள்ளார். இந்நிலையில், ராஜ்பவனில் பழங்குடியின பிரதிநிதிகளுடன் குடியரசுத் தலைவர் வெள்ளிக்கிழமை கலந்துரையாடினார்.

ஆளுநர் ஆர்.என்.ரவி, தமிழக பிற்படுத்தப்பட்டோர் நலத் துறை அமைச்சர் சிவ.வீ.மெய்யநாதன் முன்னிலையில் நடைபெற்ற இந்த நிகழ்ச்சியில், நீலகிரி ஆதிவாசி நலச் சங்கத்தின் தலைவர் ஆல்வாஸ் உள்ளிட்ட பழங்குடியின பிரதிநிதிகள், தங்கள் மக்களின் சமூக, பொருளாதார நிலை குறித்தும், கோரிக்கைகள் குறித்தும் குடியரசுத் தலைவரிடம் எடுத்துரைத்தனர்.

இதைத் தொடர்ந்து பழங்குடியின பிரதிநிதிகளிடையே குடியரசுத் தலைவர் பேசியதாவது: நானும் பழங்குடியினத்தைச் சேர்ந்தவள் என்பதால் பழங்குடியின மக்களின் கல்வி, சமூக, பொருளாதாரப் பிரச்னைகளை நன்கு அறிவேன். பழங்குடியினத்தவர் நலனுக்காக அரசு அமைத்த பல்வேறு குழுக்களில் இடம் பெற்றிருக்கிறேன்.