மாற்றுத்திறனாளிகளின் நம்பிக்கைச் சிறகுகள்!

அமெரிக்காவின் டென்னஸி மாகாணத்தில் வாழ்ந்த தம்பதிக்கு ஒரு பெண் குழந்தை இடதுகால் போலியோவினால் பாதிக்கப்பட்டு வெறும் இரண்டு கிலோ எடையுடன் பிறந்தது.

- பொ. ஜெயச்சந்திரன்

காலுக்கு உலோகக்கவசம் போட்டால் மட்டுமே நேராக நிற்க முடியும் என்ற சூழல் இருந்தது. அந்தப் பெண்ணிடம் சிறு வயதில், "நீ என்னவாக விரும்புகிறாய்?" என்று கேட்டார்கள். அதற்கு அவள், "நான் விளையாட்டு வீராங்கனையாக வேண்டும், ஓட்டப் பந்தயங்களில் பங்குபெற்று வெற்றிபெற வேண்டும்" என்றாள்.

தனியாக நிற்கக் கூட முடியாதவள், கடும் முயற்சி செய்து தனது 12-ஆம் வயதில் உலோக கவசம் இல்லாமலேயே நிற்க ஆரம்பித்தாள். வாய்ப்புக் கிடைத்த அனைத்து ஓட்டப் பந்தயங்களிலும் ஓடினாள். ஓட்டப்பந்தயத்தில் கடைசியில் வந்த அவளைக் கிண்டலும், கேலியும் செய்தனர். தோற்று விடுவோம் என்ற எண்ணத்தைத் தொலைவில் எறிந்துவிட்ட அவளிடம் வெற்றி பெறுவோம் என்ற இலக்கு மட்டுமே இருந்தது.

1956-ஆம் ஆண்டு தொடர் ஓட்டத்தில் ஒலிம்பிக்கில் வெண்கலப் பதக்கம் வென்றார். 1960-ஆம் ஆண்டு ஒலிம்பிக்கில் 100, 200, 400 மீட்டர் என மூன்று ஓட்டப் பந்தயத்திலும் தங்கப் பதக்கங்கள் வென்று உலகத்தையே தன் பக்கம் திரும்பிப் பார்க்க வைத்த அந்தப் பெண்மணிதான் வில்மா ருடோல்ஃப் என்ற மாற்றுத்திறனாளி.

இந்தியா சார்பில் பாராலிம்பிக் போட்டியில் தங்கப்பதக்கம் வென்ற மாரியப்பன், வெள்ளிப் பதக்கம் வென்ற ஹரியண்ணாவைச் சேர்ந்த தீபா மாலிக், மூவர்ணக் கொடியை எவரெஸ்ட் சிகரத்தில் ஏற்றிய அருணிமா சின்ஹா, பரதத்தில் சாதனை புரிந்த சுதா சந்திரன் அனைவரும் மாற்றுத் திறனாளிகளின் மணிமகுடங்கள்.