விமானப் போக்குவரத்து மசோதா: நாடாளுமன்றத்தில் நிறைவேற்றம்

90 ஆண்டுகள் பழைய சட்டத்துக்கு மாற்றாக

சுமார் 90 ஆண்டுகால பழைமையான விமானச் சட்டத்துக்குப் பதிலாகக் கொண்டு வரப்பட்ட புதிய விமானப் போக்குவரத்து மசோதா (பாரதிய வாயுயான் விதேயக்) நாடாளுமன்றத்தில் வியாழக்கிழமை நிறைவேறியது.

மக்களவையில் கடந்த ஆகஸ்ட் 9-ஆம் தேதி நிறைவேறிய (விமானப் போக்குவரத்து மசோதா) மசோதா, குரல் வாக்கெடுப்பு மூலம் மாநிலங்களவையில் வியாழக்கிழமை நிறைவேற்றப்பட்டது. குடியரசுத் தலைவர் ஒப்புதலுக்குப் பின் இந்த மசோதா சட்டமாக அமலாகவுள்ளது.

விமானச் சட்டம் 1934-இல் இதுவரை 21 முறை திருத்தப்பட்டுள்ளது. அதில் உள்ள குறைபாடுகளைக் களைந்தும், விமானப் போக்குவரத்துத் துறையில் முதலீடுகளை ஈர்க்கவும், எளிதான வணிகத்தை ஊக்குவிக்கவும் இந்தப் புதிய மசோதா நிறைவேற்றப்பட்டுள்ளது.

விமானக் கட்டணக் குறைப்பு: இந்த மசோதா மீதான விவாதத்தில் விமானப் போக்குவரத்துத் துறை அமைச்சர் ராம் மோகன் நாயுடு பேசியதாவது:

விமானப் பயணக் கட்டணம் அதிகமாக உள்ளதாகச் சிலர் குற்றஞ்சாட்டியுள்ளனர். கடந்த 1994 முதல் விமானக் கட்டண முறை ஒழுங்குபடுத்தப்படவில்லை. இந்தியாவில் மட்டுமின்றி உலகளவிலும் இதே நடைமுறைதான் தொடர்ந்து வருகிறது. எனினும், விமானக் கட்டணங்களை நிர்ணயிக்கும் முன் அமைச்சகத்துக்கு விமான நிறுவனங்கள் கட்டாயம் தெரிவிக்க வேண்டும். விமானக் கட்டணங்களை கண்காணிக்கத் தனிப்பிரிவு செயல்பட்டு வருகிறது.