நிதி ஒதுக்கீடு செய்தும் செலவழிக்கப்படாத ரூ.1,000 கோடி

தமிழக அரசுத் துறை சார்ந்த நிதி ஒதுக்கீடு செய்யப்பட்டும் ரூ.1,000 கோடி வரை செலவழிக்கப்படவில்லை என இந்திய கணக்கு தணிக்கை அறிக்கையில் (சிஏஜி) தெரிவிக்கப்பட்டுள்ளது.

2018-19 முதல் 2022-23 காலகட்டத்தில் மேற்கொள்ளப்பட்ட தமிழக அரசின் நிதிநிலை அறிக்கையின் நடைமுறைகள், வரவுசெலவு திட்ட மேலாண்மை மற்றும் நிதி தொடர்பான விவரங்கள் மீது மேற்கொள்ளப்பட்ட இந்திய கணக்கு தணிக்கைத் தலைவரின் தணிக்கை அறிக்கை செவ்வாய்க்கிழமை சட்டப்பேரவையில் தாக்கல் செய்யப்பட்டது.

நிதிப் பற்றாக்குறை:
இந்த அறிக்கையின் விவரங்களை தமிழ்நாடு மற்றும் புதுச்சேரியின் முதன்மை கணக்காய்வுத் தலைவர் டி. ஜெய்சங்கர் சென்னையில் செய்தியாளர்களிடம் விளக்கினார்.

அவர் மேலும் கூறியதாவது:
2018-19 நிதியாண்டில் ரூ.23,459 கோடியாக இருந்த வருவாய்ப்பற்றாக்குறை 2021-22 நிதியாண்டில் ரூ.46,538 கோடியும், 2022-23 நிதியாண்டில் ரூ.36,215 கோடியுமாக அதிகரித்துள்ளது.

அதே நேரத்தில், மாநிலத்தின் மீதான நிதிப் பற்றாக்குறை 2018-19இல் ரூ.47,335 கோடியாக (2.90 சதவீதம்) இருந்த நிலையில், 2022-23இல் ரூ.81,886 கோடியாக (3.46 சதவீதம்) அதிகரித்துள்ளது.

தொழில் மற்றும் சேவைத்துறைகளின் பங்களிப்பு அதிகரித்ததன் காரணமாக மொத்த மாநில உள்நாட்டு உற்பத்தி கடந்த ஆண்டை விட 14 சதவீதம் வளர்ச்சியடைந்துள்ளது.