தங்க நகை விற்பனையில் தரக் குறியீடு: மத்திய அரசு பதிலளிக்க உத்தரவு

இந்தியாவில் மொத்தம் 803 மாவட்டங்கள் உள்ள நிலையில், தங்க நகை விற்பனையில் 343 மாவட்டங்களுக்கு மட்டும் ‘ஹால்மார்க்’ தரக் குறியீடு கட்டாயமாக்கப்பட்டது ஏன்? இதனால், பிற மாவட்டங்களில் முறைகேடுகள் நடைபெறாதா என கேள்விகள் எழுப்பிய சென்னை உயர்நீதிமன்ற மதுரை அமர்வு, இதுகுறித்து மத்திய அரசு பதிலளிக்க புதன்கிழமை உத்தரவிட்டது.

மதுரை, மார்ச் 19:

விருதுநகர் மாவட்டத்தைச் சேர்ந்த சுரேஷ்குமார் சென்னை உயர்நீதிமன்ற மதுரை அமர்வில் தாக்கல் செய்த பொதுநல மனு:

உலக நாடுகளில், இந்தியா தங்கம் பயன்படுத்துவதில் 2-ஆவது இடத்தை வகிக்கிறது. இந்தியாவில் ஆண்டுக்கு 600 டன் தங்கம் விற்பனையாகிறது. இதைக் கருத்தில் கொண்டு, கடந்த 2018-ஆம் ஆண்டு மத்திய அரசு தங்க நகை தரக் கட்டுப்பாடு சட்டத்தின்படி, தங்க நகைகளில் ஹால்மார்க் தரக் குறியீடு முத்திரையிடுவதை கட்டாயமாக்கியது.