ബോൽസൊനാരോയുടെ അനുയായികളെ സൈന്യം തുരത്തി ബ്രസീലിൽ ‘ക്യാപ്പിറ്റോൾ കലാപം

പാർലമെന്റിന്റെയും സുപ്രീംകോടതിയുടെയും നിയന്ത്രണം തിരിച്ചുപിടിച്ച് ബ്രസീൽ സേന

ബ്രസീലിയ; രാജ്യത്ത് കലാപമഴിച്ചുവിട്ട്, മുൻ പ്രസിഡന്റ് ജയ്ർ ബോൽസൊനാരോയുടെ അനുയായികളെ തുരത്തി തന്ത്രപ്രധാനകേന്ദ്രങ്ങളുടെ നിയന്ത്രണം തിരിച്ചു പിടിച്ച് ബ്രസീൽ സുരക്ഷാസേന. സംഭവത്തിൽ ഇരുന്നൂറോളം പ്രതിഷേധക്കാർ അറസ്റ്റിൽ. പ്രസിഡന്റിന്റെ കൊട്ടാരത്തിലേക്ക് കടന്നുകയറാൻ ശ്രമിച്ച മുപ്പതോളം പേരെ പോലീസ് അറസ്റ്റ് ചെയ്തു നീക്കി. ബ്രസീൽ പാർലമെന്റ് മന്ദിരത്തിന്റെയും സുപ്രീം കോടതിയുടെയും പ്രസിഡന്റിന്റെ കൊട്ടാരത്തിന്റെയും നിയന്ത്രണം ബ്രസീൽ സേന തിരിച്ചുപിടിച്ചു.

2021 ജനുവരി ആറിന് അന്നത്തെ അമേരിക്കൻ പ്രസിഡന്റ് ഡോണൾഡ് ട്രംപിന് തെരഞ്ഞെടുപ്പിൽ തിരിച്ചടി നേരിട്ടതിനു പിന്നാലെ അനുയായികൾ യു.എസ്. ക്യാപിറ്റോൾ കെട്ടിടം ആക്രമിച്ചതിനെ അനുസ്മരിപ്പിക്കുന്ന രംഗങ്ങളാണ് ബ്രസീലിലും അരങ്ങേറിയത്. പ്രസിഡന്റ് തെരഞ്ഞെടുപ്പ് ഫലം എതിരാളിയായ ലുല ഡസിൽവയ്ക്ക് അനുകൂലമായതോടെയാണ് മുൻ പ്രസിഡന്റിന്റെ അനുയായികൾ തെരുവിലിറങ്ങിയത്.

ഫലം പുനഃപരിശോധിക്കണമെന്നാവശ്യപ്പെട്ട് ബ്രസീലിയൻ പതാകയുടെ നിറത്തിലുള്ള വസ്ത്രങ്ങളിഞ്ഞ് ആയിരങ്ങൾ പ്രകോപനപരമായ മുദ്രാവാക്യവുമായി തന്ത്രപ്രധാനകേന്ദ്രങ്ങളിലേക്ക് ഇരച്ചെത്തി. പാർലമെന്റ് മന്ദിരവും സുപ്രീം കോടതിയും ആക്രമിച്ച തീവ്രവലതുപക്ഷക്കാരായ കലാപകാരികൾ, പ്രസിഡന്റ് ലുല ഡസിൽവയുടെ കൊട്ടാരത്തിനു നേരെയും ആക്രമണം നടത്തി.