મચ્છરોનું બ્રીડિંગઃ પૂર્વ અમદાવાદની અનેક સોસાયટીઓ પર AMC ત્રાટક્યું

ગોમતીપુર, દાણીલીમડા, ખાડિયા, શાહપુર, નરોડા, ઇન્ડિયા કોલોની, વસ્ત્રાલ, બહેરામપુરા, બાપુનગર વગેરે વિસ્તારોમાં મચ્છરોના લારવા મળ્યા

અમદાવાદ, ગુરુવાર

શહેરમાં મચ્છરોનો ઉપદ્રવ વધ્યો છે, જેના કારણે મચ્છરજન્ય રોગચાળાએ પણ ઉપાડો લીધો છે. ખાનગી દવાખાનાં સવાર-સાંજ દર્દીઓથી ઊભરાઈ રહ્યાં છે, જેના કારણે મ્યુનિ. હેલ્થ વિભાગે ગઈ કાલે સમગ્ર અમદાવાદની કુલ ૬૨૬ સોસાયટીની મુલાકાત લઈને કુલ ૬૪,૪૦૧ ઘરનું ચેકિંગ કર્યું હતું, જે પૈકી ૮૭૩ ઘરમાં મચ્છરનું બ્રીડિંગ મળી આવતાં તમામ ઘરને નોટિસ ફટકારાઈ હતી તેમજ કુલ રૂ. ૧,૬૬,૭૦૦નો વહીવટી ચાર્જ વસૂલ્યો હતો. દરમિયાન, હેલ્થ વિભાગે પૂર્વ અમદાવાદની અનેક સોસાયટીઓમાં ત્રાટકીને દંડાત્મક કાર્યવાહી હાથ ધરતાં સ્વચ્છતા પ્રત્યે બેદરકારી દાખવતા લોકોમાં ફફડાટ ફેલાઈ ગયો હતો.

પશ્ચિમ અમદાવાદના ગોતા, ચાંદલોડિયા, સરખેજ, વાસણા, પાલડી, નવરંગપુરા, મકતમપુરા, નારણપુરા, બોડકદેવ, જોધપુર, ચાંદખેડા વોર્ડની સોસાયટીમાં હેલ્થ વિભાગે મચ્છરનાં બ્રીડિંગની તપાસ હાથ ધરીને રૂ. ૧૦ હજાર સુધીનો વહીવટી ચાર્જ વસૂલ્યો હતો.