કોંગ્રેસના ‘ગુજરાત બંધ’ એલાનને લોકોનો મિશ્ર પ્રતિસાદ

મોંઘવારી-બેરોજગારીના મુદ્દે બપોરના ૧ર વાગ્યા સુધી અપાયેલા બંધના મામલે કોંગ્રેસના નેતાઓની અટકાયત

અમદાવાદ, શનિવાર

ગુજરાતમાં આગામી વિધાનસભા ચૂંટણીને લઈ રાજકારણ ગરમાયું છે. ભાજપ અને કોંગ્રેસ જેવા પરંપરાગત હરીફ રાજકીય પક્ષોની સાથે આમ આદમી પાર્ટી (આપ)એ પણ ચૂંટણી જંગમાં ઝંપલાવ્યું છે. દરમિયાન રાજ્યના મુખ્ય વિપક્ષ કોંગ્રેસ દ્વારા મોંઘવારી અને બેરોજગારી સહિતના મુદ્દે ભાજપ સરકારને ઘેરવા આજે ગુજરાત બંધનું એલાન અપાયું હતું. બપોરના ૧૨ વાગ્યા સુધીના બંધના એલાનને અમદાવાદમાં લોકો તરફથી મિશ્ર પ્રતિસાદ મળ્યો હોવાનું જાણવા મળ્યું હતું.

મોંઘવારી અને બેરોજગારી સહિતના મુદ્દે કોંગ્રેસ દ્વારા સમગ્ર ગુજરાતમાં આજે બપોરના ૧૨ વાગ્યા સુધી આંશિક બંધનું એલાન અપાયું હતું. કોંગ્રેસના આગેવાનોએ વેપારીઓ અને લોકોને સ્વેચ્છાએ આ બંધ જોડાવવા માટે અપીલ કરી હતી, જોકે રાજ્યની આર્થિક રાજધાની ગણાતા અમદાવાદમાં કોટ વિસ્તારમાં સજ્જડ બંધ જોવા મળ્યો હતો, જ્યારે અન્ય વિસ્તારોમાં વેપારીઓએ બંધની ઉપેક્ષા કરી હતી.