બોર્ડની પરીક્ષામાં ગેરરીતિ રોકવા શાળાના નોટિસ બોર્ડ ઉપર શિક્ષા કોષ્ટક લગાવાશે

પરીક્ષામાં થતી ગેરરીતિ બાબતે વિદ્યાર્થીઓમાં જાગૃતિ વધે તે માટે નિબંધ અને વક્તૃત્વ સ્પર્ધા પણ યોજાશે

અમદાવાદ, ગુરુવાર

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા લેવાનારી આગામી માર્ચ-૨૦૨૩ની એસએસસી અને એચએસસીની પરીક્ષામાં ગેરરીતિ વગર અને ભયમુક્ત વાતાવરણમાં પરીક્ષા યોજાય તે માટે બોર્ડ દ્વારા આગોતરું આયોજન કરવામાં આવ્યું છે. વિદ્યાર્થીનું ભવિષ્ય ન બગડે તે માટે ગેરરીતિ કેસ અંગે બનતા ગુનાઓ સામે લેવાનાં પગલાંથી તમામ વિદ્યાર્થી જાગૃત માનસિકતા અને પૂર્વ તૈયારી સાથે પરીક્ષા માટે સજ્જ બને તે માટે શાળાઓમાં શિક્ષા કોષ્ટકથી વિદ્યાર્થીઓને માહિતગાર કરવામાં આવશે.

આ ઉપરાંત આરટીઈ અંતર્ગત અધવચ્ચે શાળા છોડીને જતા રહેતા વિદ્યાર્થીએ શા માટે શાળા છોડી તે અંગે શાળાએ ખુલાસો અને અને કારણ બોર્ડને જણાવવાં પડશે.