હવે અમદાવાદમાં રવિવાર સુધી ભારે વરસાદની શક્યતા નથી તેવી આગાહીથી લોકોમાં હાશકારો

છેલ્લા ૨૪ કલાકમાં જૂનાગઢના મેંદરડામાં પાંચ ઈંચ જેટલો વરસાદ ખાબક્યોઃ રાજ્યમાં વરસાદનું જોર ઘટ્યું

અમદાવાદ, સોમવાર

અગાઉ હવામાનખાતાની આગાહી મુજબ શનિવાર સવારથી મંગળવાર સવાર સુધીના ૭૨ કલાક અમદાવાદીઓ માટે અષાઢી આફતના હતા. ગઈ કાલે તો સૂર્યનારાયણે દેખા દેતાં લોકોને રાહત થઈ હતી, જોકે શનિવારે શહેરમાં વરસાદે હાજરી આપી હતી. આજે સવારથી વાદળછાયું વાતાવરણ છે, તેમ છતાં છેક રવિવાર સુધી શહેરમાં ભારે વરસાદ પડે તેવી કોઈ આગાહી નથી. હવામાન વિભાગે એક અઠવાડિયા સુધી અમદાવાદમાં હળવો વરસાદ પડશે તેવી આગાહી કરતાં આનાથી લોકો ચોક્કસપણે હળવાશ અનુભવી શકશે.