મેઘમલ્હારઃ દક્ષિણ ગુજરાતમાં આજે ભારે વરસાદ તટી પડવાની સંભાવના

અમદાવાદ સહિતના વિસ્તારમાં હળવો વરસાદ વરસશેઃ ૨૪ કલાકમાં ૭૧ તાલુકામાં સામાન્ય વરસાદ નોંધાયો

અમદાવાદ, ગુરુવાર

શહેર સહિત રાજ્યભરમાં વરસાદનો ત્રીજો રાઉન્ડ પૂરો થઈ ચૂક્યો છે અને તેનું જોર સાવ નહીંવત્ થઈ જવાથી લોકો રાહત અનુભવી રહ્યા છે. રાજ્યમાં ઠેર ઠેર સામાન્ય જનજીવન રાબેતા મુજબનું થઈ ગયું છે. ખેડૂત આલમ પણ વરસાદે વિરામ લેતાં તેના ખેતીકામમાં ઉત્સાહપૂર્વક જોતરાઈ ગયો છે. જોકે હવે વરસાદના ચોથા રાઉન્ડની આગાહીએ જોર પકડ્યું છે. આ દરમિયાન સ્થાનિક હવામાન વિભાગે આજે રાજ્યના દક્ષિણ ભાગમાં ભારે વરસાદ પડવાની શક્યતા વ્યક્ત કરી છે.

ગુજરાતના દરિયાકાંઠે પવનનું જોર વધુ છે. પશ્ચિમ બંગાળની ઉપર જે ડીપડિપ્રેશન છે તેની પણ અસર ગુજરાતમાં ભારે પવન સાથે થઈ રહી છે. જોકે આ સિસ્ટમની અસર વરસાદની દૃષ્ટિએ ગુજરાત પર થવાની શક્યતા નથી. કારણ કે તે ઉત્તર-પશ્ચિમ તરફ ગતિ કરશે તેમ માનવામાં આવી રહ્યું છે. જોકે ભારે પવનના કારણે દક્ષિણ ગુજરાતના એકાદ જિલ્લામાં ભારે વરસાદની શક્યતા ઊભી થઈ છે.