સિક્યોરિટી ગાર્ડે ટિપ આપી તે યુપીના લૂંટારુઓએ જ્વેલર્સ-શો-રૂમ લૂંટી લીધો

અમદાવાદ જિલ્લા પોલીસે સિક્યોરિટી ગાર્ડ સહિત દસ શંકાસ્પદની અટકાયત કરી લૂંટારુઓને ઝડપી લેવા માટે પોલીસની ટીમ યુપી પહોંચી

શહેરના છેવાડે આવેલા સાઉથ બોપલ વિસ્તારમાં ધોળા દિવસે થયેલી ૫૦ લાખથી વધુ કિંમતના સોના-ચાંદીના દાગીનાની ચકચારી લૂંટના કેસમાં પોલીસને સફળતા મળી ગઈ છે. પોલીસે સિક્યોરિટી ગાર્ડ સહિત દસ લોકોની અટકાયત કરી છે અને લૂંટની ઘટનાને અંજામ આપનાર ચાર લૂંટારુઓને ઝડપી લેવા માટે પોલીસની ટીમ યુપી પહોંચી છે. જ્વેલર્સના શો-રૂમ નજીક આવેલી એક જગ્યા પર સિક્યોરિટી ગાર્ડ તરીકે ફરજ બજાવતા યુવકે લૂંટારુઓને ટિપ આપી હતી. યુવકે ટિપ આપ્યા બાદ લૂંટારુઓ બંદૂકની અણીએ લૂંટની ઘટનાને અંજામ આપીને નાસી ગયા હતા.

બોપલના મેરીગોલ્ડ સર્કલ પાસે આવેલા શાલિગ્રામ પ્રાઇમમાં કનકપુરા જ્વેલર્સ નામનો શો-રૂમ ભરતભાઈ લોઢિયા તથા મનસુખભાઈ ભાગીદારીમાં ચલાવે છે. ગુરુવારે બપોરના ત્રણ વાગ્યાની આસપાસ તેઓ હાજર હતા ત્યારે ત્રણ વ્યક્તિઓ મોઢા પર રૂમાલ બાંધીને આવી હતી, જ્યારે એક વ્યક્તિએ હેલ્મેટ પહેરી હતી. પહેલાં તો તેઓ દાગીના ખરીદવા છે – તેમ કહીને અંદર ઘૂસ્યા હતા. ગણતરીની મિનિટોમાં લૂંટારુઓ બંદૂકની અણીએ ૫૦ લાખથી વધુ કિંમતના સોના-ચાંદીના દાગીનાની લૂંટ કરીને નાસી છૂટ્યા હતા. લૂંટારુઓએ શો-રૂમમાં ઘૂસીને ભરતભાઇ અને મનસુખભાઇના મોબાઇલ ફોન ઝૂંટવી લીધા હતા.