ஆசியான் மாநாட்டில் 10 அம்சத் திட்டத்தை முன்வைத்தார் மோடி

ஆசியானுக்கும் இந்தியாவுக்கும் இடையிலான முழுமையான உத்திபூர்வ பங்காளித்துவத்தை வலுப்படுத்த 10 அம்சத் திட்டத்தை முன்வைத்தார் இந்தியப் பிரதமர் நரேந்திர மோடி.

- இர்ஷாத் முஹம்மது

ஆசியாவின் எதிர்காலத்திற்கு ஆசியான்-இந்தியா உறவு இன்றியமையாதது என்று கூறிய அவர், இரு தரப்புக்கும் இடையிலான வர்த்தகம் கடந்த 10 ஆண்டுகளில் இருமடங்குக்கு மேல் அதிகரித்து 130 பில்லியன் அமெரிக்க டாலராக இருப்பதைச் சுட்டினார்.

தென்கிழக்காசியாவின் 10 நாடுகளை உறுப்பினர்களாகக் கொண்ட ஆசியான் வட்டார அமைப்பின் உச்சநிலை மாநாடு லாவோஸ் தலைநகர் வியந்தியனில் அக்டோபர் 9 முதல் 11ஆம் தேதி வரை நடைபெற்று வருகிறது.

இரண்டாம் நாளான அக்டோபர் 10ஆம் தேதி இதர பங்காளிகளுடனான கூட்டங்கள் நடைபெற்றன. அதில் நடைபெற்ற 21வது ஆசியான்-இந்தியா கூட்டத்தில் பேசிய பிரதமர் மோடி, ‘தொடர்புத்திறனையும் மீள்திறனையும் மேம்படுத்துதல்’ எனும் இந்த ஆண்டுக்கான ஆசியானின் கருப்பொருளை ஒட்டிப் பேசினார்.

21வது ஆசியான்-இந்தியா உச்சநிலை மாநாட்டில் இந்தியப் பிரதமர் நரேந்திர மோடியும் இதர ஆசியான் தலைவர்களும் கைகோத்து, தங்களது ஒற்றுமையைப் பறைசாற்றினர்.  படம்: ராய்ட்டர்ஸ்