సుందర మనాలి

హిమాచల్ ప్రదేశ్లోని మంచుకొండల మధ్య ఉన్న మనాలీ వేసవి విడిదిగా ప్రసిద్ధి. నవంబర్ నుంచి జనవరి వరకూ చలితీవ్రంగా ఉంటుంది.

- వడ్లూరి పవన్ కుమార్

హిమాచల్ ప్రదేశ్లోని మంచుకొండల మధ్య ఉన్న మనాలీ వేసవి విడిదిగా ప్రసిద్ధి. నవంబర్ నుంచి జనవరి వరకూ చలితీవ్రంగా ఉంటుంది. మిగిలిన కాలంలో పర్యాటకుల రద్దీ మనాలీకి ఉంటుంది.ఫిబ్రవరి 25వ తేదీ ఆదివారం మేం మనాలీకి బయలుదేరాం. రోడ్డుమార్గంలో హర్యానా, చంఢీఘడ్, పంజాబ్మీదుగా ప్రయాణం చేసాం.ఢిల్లీ నుంచి మనాలీకి 570కి.మీ దూరం. మేము వెళ్లే సమయం కమలాల సీజన్. దాంతో జాతీయ రహదారి వెంట జ్యూస్ స్టాల్స్ వెలిచాయి.హిమాచల్ ప్రదేశ్ కులు జిల్లాలో మనాలీ పట్టణం ఉంది. హైవే నాలుగులైన్లతో ప్రయాణానికి అనువుగా ఉంది. జాతీయ రహదారిలో ఆరు టన్నల్స్ ఉన్నాయి. ఒక్కొక్క టన్నల్ రెండు కి.మీ నుంచి పది కిలోమీటర్ల వరకు విస్తరించి ఉన్నాయి. విద్యుత్ దీపాలకాంతిలో రహదారి చూడచక్కగా నిర్మించారు. ఢిల్లీలో 12 డిగ్రీలు ఉన్న ఉష్ణోగ్రత మనాలీ చేరేటప్పటికీ 3 డిగ్రీలుగా నమోదైంది. 18కి.మీ దూరంలో ఉన్న సోలాంగ్ వ్యాలీకి వెళ్లాం.ఈ వ్యాలీ వేసవి మినహా మిగిలిన రోజులు మంచుతో కప్పబడి ఉంటుంది. మనాలీ వచ్చిన పర్యాటకులు తప్పనిసరిగా సోలాంగ్ వ్యాలీ సందర్శిస్తారు. ఆ ప్రాంతంలో మంచు దాదాపు 4 అడుగుల మేరపరచినట్లు ఉంటుంది.