കോൺഗ്രസ്സും ജെഡിഎസും നേട്ടമുണ്ടാക്കും, പക്ഷേ..?

കർണാടകത്തിലെ തിരഞ്ഞെടുപ്പ് ചിത്രം തെളിയുമ്പോൾ

- വിഷ്ണുമംഗലം കുമാർ, ബെംഗളൂരു

കേന്ദ്രവും നിരവധി സംസ്ഥാനങ്ങളും ഭരിക്കുന്ന ബിജെപിയുടെ സർവ്വസൈന്യാധിപനായ അമിത്ഷായുടെ നേരിട്ടുള്ള ഇടപെടലുകളും പരീക്ഷണങ്ങളുമാണ് കർണാടകത്തിലെ നിയമസഭാതെരഞ്ഞെടുപ്പ് ഉദ്വേഗജനകമാക്കി മാറ്റുന്നത്. വർഷങ്ങൾ നീണ്ട കഠിനപ്രയത്നത്തിലൂടെ അടിത്തറ ശക്തിപ്പെടുത്തി പാർട്ടിയെ അധികാരത്തിലെത്തിച്ച് മുതിർന്ന നേതാവ് യെദിയൂരപ്പയുടെ നിയന്ത്രണത്തിലായിരുന്നു അടുത്തകാലം വരെ കർണാടകത്തിലെ ബിജെപി. അതുമാറ്റി പാർട്ടിയെ പൂർണ്ണമായും ദേശീയ നേതൃത്വത്തിന്റെ, തെളിച്ചുപറഞ്ഞാൽ പ്രധാനമന്ത്രിയുടെയും തന്റെയും വരുതിയിൽ കൊണ്ടുവരാനുള്ള തന്ത്രപരമായ നീക്കം അമിത്ഷാ ആരംഭിച്ചത് രണ്ടുവർഷം മുമ്പാണ് പ്രായപരിധിയുടെ കാരണം പറഞ്ഞു പരോക്ഷസമ്മർദ്ദത്തിലൂടെ യെദിയൂരപ്പയെ മുഖ്യമന്ത്രി സ്ഥാനത്തുനിന്ന് മാറ്റിക്കൊണ്ടായിരുന്നു തുടക്കം. അകംനൊന്ത യെദിയൂരപ്പ കടുത്ത തീരുമാനമെടുക്കാതെ നോക്കാൻ പ്രധാനമന്ത്രിയുടെ സേവനം അമിത്ഷാ ഉപയോഗപ്പെടുത്തുകയും ചെയ്തു.

പാർട്ടിയുടെ സംസ്ഥാനഘടകത്തെ അടിമുടി അഴിച്ചുപണിയാനും പുതിയൊരു പ്രതിച്ഛായ സൃഷ്ടിച്ചെടുക്കാനുമുള്ള കർമ്മപദ്ധതിയാണ് അമിത് ഷാ ആവിഷ്കരിച്ചത്. നിയമസഭാതെരഞ്ഞെടുപ്പിൽ പ്രമുഖ നേതാക്കൾക്കുൾപ്പെടെ സീറ്റു നിഷേധിക്കുമ്പോൾ വ്യാപകമായ പൊട്ടിത്തെറി ഉണ്ടാകുമെന്നും, ചില നേതാക്കൾ പാർട്ടി വിട്ടുപോകുമെന്നും അമിത്ഷായ്ക്ക് അറിയാമായിരുന്നു. പ്രധാനമന്ത്രിയുടെ അനുവാദത്തോടെയായിരുന്നു ശുദ്ധികലശം. എന്നാൽ നേതൃത്വം ഉദ്ദേശിച്ചതിനെക്കാൾ വലിയ കൊഴിഞ്ഞുപോക്കാണുണ്ടായത്. മുൻമുഖ്യമന്ത്രി ജഗദീഷ് ഷെട്ടാർ ഉൾപ്പെടെ പതിനേഴ് പ്രമുഖ നേതാക്കളാണ് പാർട്ടിവിട്ടത്. സംഘപരിവാർ രാഷ്ട്രീയത്തിന്റെ മുഖമായിരുന്ന ജഗദീഷ് പെട്ടാറെപ്പോലുള്ള നേതാക്കൾ കേവലമൊരു സീറ്റിനുവേണ്ടി ബിജെപി വിട്ട് കോൺഗ്രസ്സിലും ജെഡിഎസിലും ചേർന്നത് രാഷ്ട്രീയനിരീക്ഷകരെ തെല്ലൊന്നുമല്ല അമ്പരപ്പിച്ചത്. ശുദ്ധികലശത്തിന്റെ സൂത്രധാരൻ അമിത്ഷായാണെങ്കിലും തനിക്ക് സീറ്റു കിട്ടാതിരിക്കാൻ ചരടുവലിച്ചത് ബി എൽ സന്തോഷാണെന്നാണ് ഷെട്ടാർ ആരോപിച്ചത്. ആർ എസ് എസിൽ നിന്നും ബിജെപിയിലെത്തി സംഘടനാ ചുമതലയുള്ള ദേശീയ ജനറൽ സെക്രട്ടറിയായി പ്രവർത്തിക്കുന്ന കർണാടക ക്കാരനായ നേതാവാണ് ബി എൽ സന്തോഷ്. ആ ആരോപണം സന്തോഷ് നിഷേധിച്ചിരുന്നു.