అడుగు జాడలు...

దివ్యజనని శ్రీశారదాదేవి ప్రత్యక్ష శిష్యులైన స్వామి శారదేశానందజీ (1892-1988) రామకృష్ణ సంఘంలో ఎంతో గౌరవాన్నీ, ప్రేమాభిమానాలనూ చూరగొన్న గొప్ప సన్న్యాసి. ఆయన తపోమయ జీవితం, సేవాదర్శాలు అనేకమంది సాధువులకూ, భక్తులకూ స్ఫూర్తిమంతంగా నిలిచాయి.

- శ్రీమతి టి. ఆశాలత

దివ్యజనని శ్రీశారదాదేవి ప్రత్యక్ష శిష్యులైన స్వామి శారదేశానందజీ (1892-1988) రామకృష్ణ సంఘంలో ఎంతో గౌరవాన్నీ, ప్రేమాభిమానాలనూ చూరగొన్న గొప్ప సన్న్యాసి. ఆయన తపోమయ జీవితం, సేవాదర్శాలు అనేకమంది సాధువులకూ, భక్తులకూ స్ఫూర్తిమంతంగా నిలిచాయి. ఆధ్యాత్మిక సాధకులకు, ముఖ్యంగా రామకృష్ణ వివేకానంద భావధారలో ఉన్నవారికి ఆ మహనీయుని జీవిత విశేషాలు, ఆయన చేసిన సూచనలు ఉపయుక్తంగా ఉంటాయని తలచి, 2024 జనవరి సంచిక నుంచి వాటిని ధారావాహికగా ప్రచురిస్తున్నాం.

శారదమ్మ శిష్యుని విశాల దృక్పథం

శారదమ్మ మరొక శిష్యులు స్వామి నిత్యస్వరూపానందజీతో జరిగిన సంఘటన. నేను (స్వామి శుక్లాత్మానంద మఠంలో చేరిన తొలి రోజుల్లో చాలా సన్నగా ఉండేవాడిని. నా దుర్బల శరీరాన్ని చూసి ఒకసారి ఆయన 'ఏం రోగ శరీరం నీది! ఇలా ఉంటే స్వామీజీ పని ఎలా చేయగలవు? ఆయన ఇనుప కండరాలు, ఉక్కు నరాలు గల యువతను ఆశించారు' అన్నారు. అంతే!.. మా మధ్య అంతరాలు మరచిపోయి నేను ఆయనతో వాదనకు దిగాను. ఒకానొక దశలో ఆయనను విమర్శిస్తూ 'సన్నగా కాకపోతే మీలాగా లావుగా ఉండాలా?' అనేశాను. వాదన మరింత ముదిరిపోతుందని భావించిన ఆయన 'పో ఇక్కడ్నుంచి' అన్నారు. నేను మెల్లగా బయటకు వచ్చేశాను. నా మనస్సంతా అపరాధ భావనతో నిండిపోయింది.

కొద్దిసేపటి తరువాత నేను తిరిగి ఆయన దగ్గరకు వెళ్ళి, 'మహరాజ్! నాపై కోపం వహించారా? మీతో అలా వాదించినందుకు క్షమించండి' అన్నాను. అందుకాయన ఇచ్చిన సమాధానం నన్ను ఆశ్చర్యంలో ముంచెత్తింది. అక్కడికి కొద్ది దూరంలోవున్న పచ్చికబయలును చూపిస్తూ 'అదుగో అక్కడ ఆవులు మేస్తున్నాయి చూశావా! అవి ఆలోచించనూ లేవు, మాట్లాడనూ లేవు. కేవలం మనుషులే ఆ పనులు చేయగలరు. అందుకే మనుషుల మధ్య అభిప్రాయ భేదాలు కూడా! నా అభిప్రాయంతో నువ్వు ఏకీభవించనంత మాత్రాన, నీపై నేనెందుకు కోపం వహిస్తాను. నువ్వు భయపడకుండా నీ అభిప్రాయాలను వ్యక్తపరిచావు. అందుకు సంతోషించాను' అన్నారు. అలాంటి విశాల దృక్పథం కలిగివుంటే కొత్త తరానికి, పాత తరానికి అంతరాలే ఉండవు కదా! ఈ సంఘటనతో 'సాధువుల కోపం నీటిపై రాతలాంటిది' అన్న శ్రీరామకృష్ణుల వచనాలు స్ఫురణకు వచ్చాయి.

ఆయన ప్రేమ శారదమ్మ ప్రేమే !