ആനന്ദതീരത്ത ആറാട്ട്

വെള്ളച്ചാട്ടവും ബോട്ടിങ്ങും റോപ് വേയും മാർബിൾ റോക്കും ആസ്വദിച്ച് നർമ്മദ നദിയിലൂടെ ഒരു യാത്ര

- Manu Rahman

രാത്രി പതിനൊന്ന് കഴിഞ്ഞിരിക്കുന്നു. ട്രാക്കിന്റെ തുമ്പിൽ ലോഹം ഉരയുന്ന നേർത്ത ശബ്ദം, കണ്ണെത്തുന്നിടത്ത് ഒന്നും കണ്ടില്ല, ഏതാനും നിമിഷം കഴിഞ്ഞപ്പോഴേക്കും ചുട്ടികുത്തിയ പോലുള്ള മുഖം പ്രത്യക്ഷമായി. ഇരുളിൽ ശക്തിയേറിയ വെളിച്ചത്തിൽ ഉറഞ്ഞുതുള്ളുന്ന തെയ്യത്തിന്റെ പകർച്ചതോന്നി. കോയമ്പത്തൂരിൽ നിന്ന് ജബൽപ്പൂരിലേക്ക് ആഴ്ചയിലൊരിക്കൽ യാത്ര നടത്തുന്ന സ്പെഷ്യൽ ട്രെയിനാണിത്. രാത്രിയായതിനാൽ ഇടിച്ചു കയറാൻ മാത്രം ആളുകളൊന്നും പ്ലാറ്റ് ഫോമിലില്ല. ബാഗുമെടുത്ത് അകത്തേക്ക് കടന്നു. എല്ലാവരും ഉറക്കത്തിലാണ്. ബെർത്ത് കണ്ടെത്തി ഉറങ്ങാൻ കിടന്നു. കുറേ തവണ വന്ന വഴിയാണല്ലോ. കൊങ്കണും പനവേലുമെല്ലാം കഴിഞ്ഞതോടെ ബെർത്തുകളിൽ ഭൂരിഭാഗവും കാലിയായി. 35 മണിക്കൂർ യാത്ര വലിയ വിശേഷങ്ങളില്ലാതെ കടന്നുപോയി.

ശിശുപാലന്മാരുടെ ചേദി രാജ്യം

ജബൽപ്പൂർ പട്ടണ പ്രാന്തത്തിലുള്ള പ്രദേശമാണ് മദൻ മഹൽ. പതിനൊന്നാം നൂറ്റാണ്ടിൽ രാജഗോണ്ട് ഭരണാധികാരികൾ പണികഴിപ്പിച്ച മദൻ മഹലിലെ റാണി ദുർഗാവതി കോട്ടയാണ് ഈ പ്രദേശത്തെ ചരിത്ര പ്രാധാന്യമുള്ളതാക്കി മാറ്റിയത്. നർമ്മദയുടെ ദാനമാണ് ജബൽപ്പൂർ നഗരം. നഗരനാമത്തിന് പിന്നിൽ നിരവധി കഥകളുണ്ട്. ജബലി എന്ന സന്യാസി നർമ്മദയുടെ തീരത്ത് തപസ് ചെയ്തിരുന്നെന്നും അതിൽ നിന്നാണ് പേര് ഉണ്ടായതെന്നുമാണ് അവയിലൊന്ന്. അബി ഭാഷയിൽ ജബൽ എന്നാൽ മല എന്നാണ്. ഇതിൽ നിന്നുമാണെന്ന് മറ്റൊരു വാദം. ബ്രിട്ടീഷ് ഭരണകാലത്ത് ജബ്ദുൽ പോർ എന്നായിരുന്നു. 2006 ൽ മുനിസിപ്പൽ കോർപറേഷനാണ് പുനർനാമകരണം ചെയ്തത്. ഹൈന്ദവ പുരാണ പ്രകാരം മൂന്ന് അസുരന്മാർ ഈ പ്രദേശത്ത് കഴിഞ്ഞിരുന്നെന്നും മൂന്നു പേരെയും ശിവൻ പരാജയപ്പെടുത്തിയെന്നും ഒരു കഥയുണ്ട്. അസുരന്മാരിൽ പ്രധാനിയായ ത്രിപുരാസുരൻ നഗരത്തിന് ത്രിപുർ തീർഥ് എന്നു പേര് നൽകിയെന്നും പുരാണങ്ങൾ പറയുന്നു. മഹാഭാരതം എഴുതപ്പെട്ട കാലത്ത് ഉണ്ടായിരുന്ന ശിശുപാലന്മാരുടെ ചേദി രാജ്യം ഇവിടമായിരുന്നെന്നാണ് കരുതപ്പെടുന്നത്. സ്റ്റേഷന് സമീപത്തായാണ് മുറിയെടുത്തത്. ചെറിയ മുറി. സന്ധ്യയാ യിത്തുടങ്ങിയതിനാൽ കൊതുകുകൾ പാറുന്നു. അപരിചിതമായ ഈ നഗരത്തിലെ കൊതുകുകൾ ഏത് തരക്കാരവുമെന്ന ആധിയിൽ കണ്ണടച്ചു കിടന്നു. ഉറക്കം നടക്കുന്ന ലക്ഷണം കണ്ടില്ല. ദേഹത്ത് എന്തെല്ലാമോ അരിച്ചു നടക്കുന്നു. അതിൽ തട്ടി ഉറക്കം ഉടഞ്ഞുപോയി.

ബഡാഘാട്ടിലേക്ക്