കഴുകൻ എന്ന നായകൻ

കാടിന്റെ ശുചിത്വപരിപാലകരാണ് കഴുകൻമാർ. വില്ലനല്ല, നായകരാണ് ഇവരെന്ന് കാട് തന്നെ സാക്ഷ്യം പറയും

- AZEEZ MAHE

വനഭൂമിയുടെ വിശുദ്ധ ലാവണ്യം മലിനീകരിക്കപ്പെടാതെ കാത്തു വെക്കുന്നതിൽ സുപ്രധാന പങ്ക് വഹിക്കുന്നവരായിട്ടും, വനസൗന്ദര്യത്തിൽ നിലീനരായി കാടുകയറുന്നവരുടെ ഉൾത്തടങ്ങളിൽ ഒരിക്കൽ പോലും കൂടുകൂട്ടാൻ ഭാഗ്യം ലഭിക്കാതെ പോകുന്നവർ. ക്ഷയിച്ചു കൊണ്ടിരിക്കുന്ന ഒരു വംശാവലിയുടെ അതിജീവന കഥയാണ് ഇന്ത്യൻ ഉപഭൂഖണ്ഡത്തിലെയും ആഫ്രിക്കൻ വൻകരയിലെയും കഴുകന്മാരുടെ ജീവിതായനം സാക്ഷ്യപ്പെടുത്തുന്നത്.

കാട്, മൃതാവശിഷ്ടങ്ങളാൽ ദുർഗന്ധം വമിക്കുന്ന, പുഴുക്കളിഴയുന്ന മാലിന്യ കൂമ്പാരമാകാതെ അത് കൂട്ടമായി പറന്നിറങ്ങി, തിന്നൊടുക്കി ഒരു മാംസത്തുണ്ടുപോലും അവശേഷിക്കാതെ ശുചീകരിക്കുന്ന ശൗചകർമികളാണ് കഴുകന്മാർ. വനഭൂമിയിൽ "ശവുണ്ടിക ളെപ്പോലെ തീണ്ടാപ്പാടകലെ നിർത്തപ്പെടുന്ന പറവക്കൂട്ടം പാർശ്വവത്കരിക്കപ്പെടുന്നവരോടുള്ള മമത ആത്മാവിൽ സ്പന്ദിക്കുന്നതു കൊണ്ടാവാം കഴുകന്മാരുടെ ജീവിതം തേടി പലപാടുള്ള യാത്രകൾ!

ലോകത്തൊട്ടാകെയുള്ള ഇരുപത്തിമൂന്നോളം സ്പീഷിസുകളിൽപ്പെട്ട കഴുകൻ ഗണത്തിൽ ഒൻപതെണ്ണം ഇന്ത്യൻ ഉപഭൂഖണ്ഡത്തിലാണ്. അതിൽ അഞ്ച് സ്പീഷീസുകളും IUCN ആപത്കരമാംവിധം വംശനാശ ഭീഷണി നേരിടുന്നവരുടെ ചെമ്പട്ടികയിൽ പെടുത്തി സംരക്ഷണം ഉറപ്പു വരുത്തുന്നവയാണ്. അവശേഷിക്കുന്നത് തമിഴ്നാട്ടിലെ മുതുമല കടുവാസങ്കേതത്തിന്റെ ഭാഗമായ മസിനഗുഡി മോയാർ ഭാഗങ്ങളിലാണ്! അതുകൊണ്ടാവാം ഇന്നിപ്പോൾ "Save Vulture' മൂവ്മെന്റ് ശക്തമാണ്. പരിശുദ്ധമായ പരിസ്ഥിതിക്കായി മാലിന്യമുക്ത ഭാവിക്കായി കഴുകന്മാരെ സംരക്ഷിക്കുക' എന്ന ബോധവത്കരണം വനംവകുപ്പും ഏറ്റെടുത്തിട്ടുണ്ട്.

ഭൂമുഖത്ത് വൻ കൂട്ടങ്ങളായി വ്യാപിച്ചിരുന്ന കഴുകന്മാരുടെ സംഖ്യ ഭീഷണമാംവിധം കുറഞ്ഞതിന് പ്രധാന കാരണം, കന്നുകാലികളിൽ സാംക്രമിക രോഗങ്ങൾ തടയാനായി പ്രയോഗിച്ചിരുന്ന ഡൈക്ലോഫിനാക് (Diclofenac) എന്ന മാരകവിഷമുള്ള രാസവസ്തുവിന്റെ പ്രയോഗമാണ്. കന്നുകാലികളുടെ മൃതാവശിഷ്ടങ്ങൾ നേരിട്ട് ഭക്ഷിച്ചും, അവയെ ഭക്ഷിക്കുന്ന കാട്ടിലെ മാംസഭോജികളുടെ മൃതശരീരങ്ങൾ ഭക്ഷിച്ചും ഒരു ഹ്രസ്വ കാലയളവിൽ ഒട്ടേറെ കഴുകൻകൂട്ടങ്ങൾ പ്രാണൻ വെടിഞ്ഞു.