അവതാരപ്പിറവിയുടെ മുന്നിൽ

പരശുരാമൻ പ്രധാനമൂർത്തിയായി ആരാധിക്കപ്പെടുന്ന ഒരേയൊരു ക്ഷേത്രമേ കേരളത്തിലുള്ളൂ, അതങ്ങ് തിരുവല്ലത്താണ്. പരശുരാമനു മുന്നിൽ ബലിതർപ്പണം നടത്തിയാൽ പിതൃക്കൾക്ക് മോക്ഷപ്രാപ്തി ലഭിക്കുമെന്നാണ് വിശ്വാസം

- REKHA NAMBIAR

വെളുപ്പിനേ ആയിരങ്ങളുടെ മന്ത്രോചാരണത്തിന്റെ അകമ്പടിയോടെയാണ് തിരുവല്ലം ഉണരുന്നത്. കേരളത്തിലെ ഏക പരശുരാമക്ഷേത്രമായ തിരുവല്ലം ഒരു പുണ്യഭൂമിയായി മാറുന്ന നേരം. ഈറനണിഞ്ഞ്, അരയിൽ വെള്ളത്തോർത്തുമുണ്ട് ചുറ്റിയ ആയിരക്കണക്കിന് ഭക്തജനങ്ങൾ ക്ഷേത്രമുറ്റത്ത് കർമിയുടെ നിർദേശങ്ങൾക്കായി കാതോർത്തു നിൽക്കുന്നു. മുറ്റത്തെ കരിങ്കൽ പ്പാളികൾ പാകിയ ബലിമണ്ഡപത്തിൽ അവരെല്ലാം തെക്കോട്ടു തിരിഞ്ഞിരുന്നു. നാക്കിലവെച്ച്, മോതിരവിരലിൽ ദർഭപ്പുല്ല് ഉപയോഗിച്ചുള്ള പവിത്രമണിഞ്ഞ് പിതൃപരമ്പരകളെ സങ്കല്പിച്ച്, അവർക്ക് അരിയും എള്ളും വെള്ളവും പുഷ്പവും ചന്ദനവും ഭസ്മവും ചേർത്ത് സമർപ്പിച്ചു. പ്രാർഥനയിൽ മുഴുകിയ കണ്ണുകൾ ഇടയ്ക്കിടെ, മറഞ്ഞുപോയ ഉറ്റവരെയോർത്ത് നനവാർന്നു...

തിരുവനന്തപുരം നഗരത്തിൽനിന്ന് ഏഴു കിലോമീറ്റർ മാറി, കഴക്കൂട്ടം-കോവളം ബൈപാസിനോടുചേർന്നാണ് തിരുവല്ലം പരശുരാമ സ്ഥിതിചെയ്യുന്നത്. ക്ഷേത്രകവാടത്തിന്റെ മുകളിലായി കൈകളിൽ മഴുവേതിയ പരശുരാമസ്വാമിയുടെ വലിയ ശില്പം കാണാം. മുന്നോട്ടേക്ക് പോകുമ്പോൾ ക്ഷേത്രക്കുളമാണ്. അതിനു മുൻവശത്തുള്ള ദേവസ്വം ഓഫീസിൽ ബലിതർപ്പണത്തിനും മറ്റ് വഴിപാടുകൾക്കുമായി രസീതെടുക്കുന്നവരുടെ തിരക്കുണ്ട്.

അനന്തപദ്മനാഭൻ വല്ലം

 വിഷ്ണുവിന്റെ ആറാമത്തെ അവതാരമാണ് പരശുരാമൻ. വല്ലം എന്നാൽ, ശ്രീപദ്മനാഭന്റെ തലഭാഗമാണെന്നാണ് വിശ്വാസം. അതുകൊണ്ടുതന്നെ തിരുവല്ലം, പദ്മനാഭസ്വാമിയുടെ പ്രിയപ്പെട്ട ഇടംകൂടിയാണ്. പ്രധാന മതിൽക്കെട്ട് കടന്ന് പരശുരാമസന്നിധിയിലേക്ക് കടക്കുമ്പോൾ ഉള്ളംകാലിൽ തണുപ്പൂറിവരും. പൂർണമായും കരിങ്കല്ലുകൊണ്ട് നിർമിച്ച ക്ഷേത്രത്തിലെ വാസ്തു ശില്പഭംഗി അവർണനീയംതന്നെ.