പാങ്തിയിലെ ചെങ്കാലൻ പുള്ളുകൾ

നാഗാലാൻഡിലെ പാങ്തി ഗ്രാമത്തിലേയ്ക്ക് വർഷം തോറും ദേശാടനത്തിനെത്തുന്ന ലക്ഷക്കണക്കിന് ചെങ്കാലൻപുള്ളുകൾ... അവയെ വേട്ടയാടി ഉപജീവനം കഴിച്ചിരുന്ന ഗോത്രവർഗക്കാർ... വർഷങ്ങൾക്കിപ്പുറം പാങ്തി പക്ഷികളുടെ സ്വർഗഭൂമിയാണ്. ആ മാറ്റത്തിന്റെ കഥയാണിത്. പക്ഷിസംരക്ഷണത്തിന്റെ പ്രകൃതിപാഠങ്ങളിലേയ്ക്കുള്ള ഒരു ഗ്രാമത്തിന്റെ യാത്രയുടെ കഥ

- G. SHAHEED

നാഗാലാൻഡിലെ വോഖാ ജില്ലയിലുള്ള പാങ്തി (Pangti) ഗ്രാമം. ആധുനികത അല്പം പോലും കടന്നെത്താത്ത, ഗോത്രവർഗക്കാരുടെ ദേശം. അവിടെ വർഷാവർഷം അരങ്ങേറുന്ന ആകാശവിസ്മയത്തിന്റെ കഥയാണിത്. ലക്ഷക്കണക്കിന് ചെങ്കാലൻ പുള്ളുകൾ (അമുർ ഫാൽക്കൺ കൂട്ടമായി അവിടേയ്ക്ക് പറന്നെത്തും. അവയെ ഗോത്രവർഗക്കാർ രുചികരമായ പക്ഷിമാംസത്തിന് വേണ്ടി മത്സരിച്ച് വേട്ടയാടി. ഒന്നിന് പത്തുരൂപ മുതൽ ഇരുപത്തിയഞ്ചുരൂപവരെ വിലയ്ക്ക് വിറ്റു. കമ്പോളത്തിൽ തിരക്കേറിയപ്പോൾ, ദൂരെയുള്ള ജില്ലകളിൽ നിന്ന് ആവശ്യക്കാരെത്തി. വർഷങ്ങളായി നടന്നുവന്ന പക്ഷിവേട്ടയും വിൽപ്പനയും പുറംലോകം അറിഞ്ഞത് വളരെ വൈകിയാണ്.

2012-ൽ പക്ഷിസംരക്ഷണത്തിനായി ഒരുകൂട്ടം പ്രകൃ തിസ്നേഹികൾ മുറവിളി യുയർത്തി. ക്രമേണ അത് ഫലംകണ്ടു. അന്നുവരെ അറിയപ്പെടാതിരുന്ന ഒരു ഗ്രാമം പക്ഷിസംരക്ഷണത്തിന്റെ പുതിയ ചരിത്രം കുറിച്ചു. അത് ആഗോളതലത്തിൽ ശ്രദ്ധ നേടി.

പക്ഷിവേട്ട തടഞ്ഞതോടെ നാഗന്മാർ ക്ഷുഭിതരായി അമ്പും വില്ലുമെടുത്ത് അതിനെ നേരിടാനൊരുങ്ങി. ഗ്രാമം സംഘർഷഭരിതമായി. പക്ഷേ, വനംവകുപ്പും സം സ്ഥാനസർക്കാരും ഉണർന്നു പ്രവർത്തിച്ചു. നിരവധി പ്രകൃതിസംരക്ഷണ സംഘടനകളും വിദ്യാർഥികളും യുവാക്കളും രംഗത്തെത്തി. വനസംര ക്ഷണവുമായി ബന്ധപ്പെട്ട് പ്രവർത്തിക്കാൻ ഗോത്രവർഗക്കാരെ പ്രോത്സാഹിപ്പിച്ചു. ക്രമേണ അവർക്ക് ബദൽ ജീവിതമാർഗം കണ്ടെത്താനുള്ള സർക്കാർ പദ്ധതി ആവിഷ്കരിച്ചതോടെ ഗ്രാമീണരുടെ രോഷം അടങ്ങിത്തുടങ്ങി. പ്രകൃതിസ്നേഹികളുടെ ഒരു കൂട്ടായ്മ രൂപപ്പെട്ട് ശക്തിയാർജിച്ചത് പൊതുജനശ്രദ്ധയാകർഷിച്ചു.