റോസ്മലയുടെ കുളിര് തേടി

കാട് എന്തെല്ലാം മായക്കാഴ്ചകളാണ് യാത്രികർക്കായി കരുതിവെക്കുന്നത്. മഞ്ഞും കുളിരുമുള്ള ശെന്തുരുണിയിലെ റോസ്മലയിലെത്തുമ്പോൾ കാടൊരു വർണവിസ്മയമായി നിറയുന്നു

- TEXT: SANTHOSH ATTINGAL

നാലുചുറ്റും കിടങ്ങുകളും വൈദ്യുത വേലിയുമൊരുക്കിയ സുരക്ഷയ്ക്ക് നടുവിൽ വനംവകുപ്പിന്റെ പള്ളിവാസൽ ക്യാമ്പ് ഷെഡ് ഒരു ഒറ്റയാനെപ്പോലെ ഉയർന്നുനിന്നു. തിരശ്ചീനമായിട്ടിരിക്കുന്ന മുളയേണി പോലെ തോന്നിക്കുന്ന ഇരുമ്പു കൊണ്ടുള്ള ഇടുങ്ങിയ പ്രവേശന കവാടത്തിലൂടെ ക്യാമ്പ് ഷെഡ്ഡിന്റെ മുറ്റത്തേക്ക് നൂണ്ടുകയറുമ്പോൾ, പുതുതായെത്തിയ അതിഥികളെ സംശയത്തോടെ വീക്ഷിച്ചുകൊണ്ട്, അതുവരെ സംഗീതമാലപിച്ചുകൊണ്ടിരുന്ന ചീവീടുകൾ ക്ഷണനേരത്തേക്ക് മൗനത്തിലാണ്ടു. വനംവകുപ്പിന്റെ റോസ്മല പാക്കേജിന്റെ ഭാഗമായി കൊടുംകാട്ടിൽ ഒരു ദിവസത്തെ രാപാർപ്പിന് വന്നതാണ്. കൂടെ ഭാര്യയും മകളുമുണ്ട്.

ഒക്ടോബർ നാലിന് തെന്മല ഫോറസ്റ്റ് ഇൻഫർമേഷൻ കേന്ദ്രത്തിലെത്തുമ്പോൾ സന്ധ്യയാകാറായിരുന്നു. ബീറ്റ് ഫോറസ്റ്റ് ഓഫീസർ ബിനിൽ കാത്തുനിൽക്കുന്നുണ്ട്. ഞങ്ങൾക്ക് പോകാനുള്ള വാഹനം എത്തുന്നതേയുള്ളൂ. ഡാം സൈറ്റൊന്ന് കണ്ട് വരാമെന്ന് ബിനിൽ പറഞ്ഞു. ഡാം സന്ദർശിച്ചിട്ട് ഏതാണ്ട് ഒരു മണിക്കൂർ കഴിഞ്ഞാണ് ഞങ്ങൾ തിരിച്ചെത്തിയത്. ബുക്കിങ് റസീറ്റിന്റെ പരിശോധനയ്ക്കുശേഷം ലഗേജുമായി വനം വകുപ്പിന്റെ ജീപ്പിലേക്ക് കയറി. ഇനിയങ്ങോട്ട് യാത്ര ഈ ജീപ്പിലാണ്. ഡ്രൈവർ സുനിൽ റെഡിയായി വന്നതോടെ റോസ് മലയിലേക്കുള്ള യാത്ര ആരംഭിച്ചു. 

റെയിൽപ്പാത താണ്ടി വനത്തിലേക്ക്

പുനലൂരിൽ നിന്നും തെന്മല വഴി തമിഴ്നാട്ടിലേക്കുള്ള റെയിൽപ്പാത പണ്ട് മീറ്റർഗേജായിരുന്നു. ബ്രോഡ്ഗേജാക്കിയതോടെ ഒരിക്കൽ നമ്മുടെ പൈതൃകമായിരുന്ന തീ തുപ്പും റെയിൽ വണ്ടി ഓർമയായി. ഞങ്ങൾ സഞ്ചരിച്ച സ്റ്റേറ്റ് ഹൈവേ സമാന്തരമായാണ് റെയിൽവേപ്പാതയും പോകുന്നത്. ചെറുതും വലുതുമായി പതിമൂന്നോളം റെയിൽവേപ്പാലങ്ങൾ ഈ റൂട്ടിലുണ്ട്. കഴുതുരുട്ടിയിലെ പാലമാണ് ഇക്കൂട്ടത്തിൽ ദീർഘമേറിയത്. പാറ തുളച്ചുണ്ടാക്കിയ റയിൽവേ ട്രാക്കിന് സമീപം നിന്ന് തദ്ദേശീയരായ ടൂറിസ്റ്റുകൾ ഫോട്ടോയെടുക്കുന്നത് കണ്ടു. അവിടെനിന്ന് ജീപ്പ് ആര്യങ്കാവ് ജങ്ഷനിലെത്തി വലത്തോട്ട് തിരിഞ്ഞ് വനപാതയിലേക്കിറങ്ങി. ഇവിടെനിന്ന് പന്ത്രണ്ട് കിലോമീറ്ററുണ്ട് റോസ്മലയ്ക്ക്.