ചേർത്തലയിൽ പോകാം മീൻകൂട്ടി ഉണ്ണാം

വറുത്തതും പൊരിച്ചതും മുളകിട്ടതുമായി മീൻവിഭവങ്ങളുടെ ചാകരയാണ് ചേർത്തലയിൽ അന്നത്തിനൊപ്പം സ്നേഹംകൂടി വിളമ്പുന്ന നാട്ടുകാർ. നാട്ടുരുചി തേടി ഒരു കറക്കം

- AJMAL PAZHERI

കേരളത്തിന്റെ ഭൂപടമെടുത്താൽ ചെവി വിടർത്തി നിൽക്കുന്ന പൂച്ചക്കുഞ്ഞിനെപ്പോലെ തോന്നിപ്പിക്കും ചേർത്തല, കടലും കായലും കരിമണലും കരിമീനും ചേർത്തലയുടെ ചേല് ഇവയെല്ലാമാണ്. കായലിലെയും കടലിലെയും ഉല്ലാസ ത്തിനൊപ്പം രുചികരമായ ഭക്ഷണവുമാണ് ഇവിടത്തെ പ്രത്യേകത. മീൻരുചികളാണ് ഏറെയും, മീൻകൂട്ടി ഊണുകഴിക്കാൻ ഇതിലും നല്ല സ്ഥലം കേരളത്തിലില്ലെന്ന് നിസ്സംശയം പറയാം.

റോയൽ എൻഫീൽഡ് ബുള്ളറ്റിലാണ് ചേർത്തലയ്ക്ക് തിരിച്ചത്. മഴക്കാറ് മൂടിനിൽ ക്കുന്നുണ്ട്. മഴദൈവങ്ങളെ മനസ്സിൽ വിളിച്ച് എറണാകുളത്തു നിന്ന് യാത്ര തുടങ്ങി. കുമ്പളങ്ങിയും അരൂരും കടന്ന് വണ്ടി ചേർത്തലയിലേക്ക് നീങ്ങി.

വൈദ്യരുടെ സ്വന്തം മീൻകട

ആദ്യം ലക്ഷ്യമിട്ടത് സ്മിത ഹോട്ടലായിരുന്നു. ഇങ്ങനെ പറഞ്ഞാൽ ആർക്കും മനസ്സിലാകില്ല. വൈദ്യരുടെ ഹോട്ടൽ' എന്നുതന്നെ പറയണം. ചേർത്തലയിൽ നിന്ന് ഒമ്പതുകിലോമീറ്റർ അകലെയാണ് കായിപ്പുറം. അവിടെയാണ് വൈദ്യരും അദ്ദേഹത്തിന്റെ മീനുലകവും,

 പച്ചപ്പുനിറഞ്ഞ വയലുകളും തലങ്ങും വിലങ്ങുമുള്ള തോടുകളും അവയ്ക്ക് കുറുകേയുള്ള പാലങ്ങളും യാത്രയെ മനോഹരമാക്കി. കാഴ്ചകൾ ആസ്വദിച്ചുതുടങ്ങുമ്പോഴേക്കും കായിപ്പുറത്ത് എത്തി. ചെറിയൊരു കവലയാണ് കായിപ്പുറം. വിരലിലെണ്ണാവുന്ന കടകൾ മാത്രം. ബഹളങ്ങളില്ല. ആ ശാന്തതയിൽ ഞങ്ങൾ കുറച്ച് തിരഞ്ഞു. പക്ഷേ, എവിടെ നോക്കിയിട്ടും വൈദ്യരുടെ ഹോട്ടൽ കാണുന്നില്ല.