അമ്പൂരിയിലെ മഞ്ഞും മലയും

കുടിയേറ്റത്തിന്റെ സ്മരണകൾ പേറുന്ന അധ്വാനികളായ മനുഷ്യരുള്ള, മലയും മഞ്ഞും ആറുമുള്ളൊരു ഗ്രാമം. അമ്പൂരിയിൽ സഞ്ചാരിയെ കാത്തിരിക്കുന്നതെല്ലാം പുതിയ കാഴ്ചകളാണ്

- PV SURAJ

ഗ്രാമം എന്ന വാക്ക് മനസ്സിലേക്ക് കൊണ്ടുവരുന്ന ചില സങ്കല്പങ്ങളുണ്ട്. എന്നാൽ, തിരുവനന്തപുരത്തിന്റെ  തെക്കേ അറ്റത്തുള്ള അമ്പൂരിയിലെത്തുമ്പോൾ, സങ്കല് പങ്ങളും മുൻധാരണകളുമെല്ലാം മാറും. ഇങ്ങനെയും ഒരു ഗ്രാമമോ എന്ന് സഞ്ചാരി വിസ്മയിക്കും. അത്തരം ചില വിസ്മയക്കാഴ്ചകളാണ് അമ്പൂരിയിലെത്തുന്നവരെ കാത്തിരിക്കുന്നത്.

കുടിയേറ്റഗ്രാമമാണ് അമ്പൂരി. വർഷങ്ങൾക്കു മുൻപ് കോട്ടയം, ചങ്ങനാശ്ശേരി, എരുമേലി ഭാഗത്തു നിന്നുള്ളവരാണ്, ഈ വാഗ്ദത്തഭൂമിയിലേക്ക് ആദ്യമെത്തിയത്. കാടിനോടും കാട്ടുമൃഗങ്ങളോടും മല്ലിട്ട് അവർ ജീവിതം തുടങ്ങി. പോകപ്പോകെ ഗ്രാമമായി വളർന്നു. കാടില്ലാതെ, ഗ്രാമത്തെ തൊട്ടൊഴുകുന്ന നെയ്യാറിനെ ക്കുറിച്ച് പറയാതെ, അമ്പൂരിക്കാരുടെ ജീവിതം പൂർണമാവില്ല.

നെയ്യാർ വന്യജീവിസങ്കേതമാണ് അമ്പൂരി ഗ്രാമത്തിലേക്കുള്ള എൻട്രി പോയിന്റ്. പുലർച്ചെ ഡാം റിസർവോയർ മഞ്ഞിൽ കുളിച്ച് നിൽക്കുന്നുണ്ടായിരുന്നു. അകലെ അഗസ്ത്യാർകൂട മലനിരകൾ. മലയിറങ്ങി വരുന്ന മഞ്ഞ്. ജനുവരിക്കുളിരിൽ മുങ്ങി അമ്പൂരിയിലേക്ക് തിരിച്ചു. ഗ്രാമം ഉണരുന്നതേയുള്ളൂ. അങ്ങാടിയിലെ സോണിച്ചേട്ടന്റെ കടയിൽ നിന്നൊരു ചായ കുടിച്ചശേഷം എരപ്പാംകുഴിയിലേക്കാണ് പോയത്. റബ്ബർ തോട്ടത്തിനും കാടിനും നടുക്കായി ഒരരുവി. മലമുകളിലെ ഉറവകൾ ഒന്നുചേർന്ന് ചെറുവെള്ളച്ചാട്ടമായി മാറിയതാണ്. തണുത്ത വെള്ളത്തിലിറങ്ങി മുഖം കഴുകി. അപ്പോഴേക്കും കുളിക്കാനായി ആളുകൾ വന്നുതുടങ്ങിയിരുന്നു.

ഊരുമക്കളെ കാണാൻ

 ആദിവാസി വിഭാഗക്കാർ താമസിക്കുന്ന പുരവിമല സെറ്റിൽമെന്റിലേക്കായിരുന്നു അടുത്ത യാത്ര. മായം പുരവിമല കടവിൽനിന്ന് കടത്തുതോണിയിൽ വേണം അക്കരെയെത്താൻ. പതിമൂന്ന് സെറ്റിൽമെന്റുകളിലായി 450-ഓളം ആദിവാസികളുണ്ട്. കുട്ടി കൾക്കായി സ്കൂളും അങ്കണവാടിയുമുണ്ട്. വനവിഭവങ്ങൾ ശേഖരിച്ച് തോണിയിൽ ഇക്കരെയെത്തി, ആവശ്യമുള്ള സാധനങ്ങൾ വാങ്ങി മടങ്ങും മുഖ്യധാരയിൽ കാണാറില്ലെങ്കിലും ഊരിലെ മക്കളില്ലാതെ അമ്പൂരിഗ്രാമം പൂർണമാവില്ല.