നോർവേയിലെ ആട് ഗ്രാമത്തിൽ

പച്ചപ്പും മഞ്ഞുപുതച്ച മലനിരകളുംകൊണ്ട് സമ്പന്നമായ നോർവേയിലെ ഉൾഗ്രാമമാണ് കൻഡാൽ. ആടുകളും ആളുകളും ഇടതിങ്ങിപ്പാർക്കുന്ന ആ ഭൂമിയിലേക്ക് യാത്ര ചെയ്യുമ്പോൾ ജീവിതം ലളിതവും സുന്ദരവുമാണെന്ന തിരിച്ചറിവ് മനസ്സിൽ നിറയും പച്ചപ്പും മഞ്ഞുപുതച്ച മലനിരകളുംകൊണ്ട് സമ്പന്നമായ നോർവേയിലെ ഉൾഗ്രാമമാണ് കൻഡാൽ. ആടുകളും ആളുകളും ഇടതിങ്ങിപ്പാർക്കുന്ന ആ ഭൂമിയിലേക്ക് യാത്ര ചെയ്യുമ്പോൾ ജീവിതം ലളിതവും സുന്ദരവുമാണെന്ന തിരിച്ചറിവ് മനസ്സിൽ നിറയും

- K KUNHIKRISHNAN

പാതിരാസൂര്യന്റെ നാടായ നോർവേയിലേക്ക് യാത്രയ്ക്കൊരുങ്ങുമ്പോൾ ആവേശ ഭരിതനായിരുന്നു ഞാൻ. മാനവവികസ നസൂചികകളിൽ ഒന്നാമതുള്ള, ഏറ്റവും സന്തുഷ്ടരായ ജനങ്ങളിൽ ലോകത്തിൽ രണ്ടാമതുള്ള, സർവോപരി യുനെസ്കോയുടെ പൈതൃകങ്ങൾ ഏറ്റവും കൂടുതലുള്ള രാജ്യത്തേക്കാണ് പോകുന്നത്, എങ്ങനെ സന്തോഷിക്കാതിരിക്കും! പക്ഷേ, യാത്രാപരിപാടിയിൽ മൂന്ന് ദിവസത്തെ താമസം ആടുവളർത്തൽ കേന്ദ്രത്തിലാണെന്ന് അറിഞ്ഞപ്പോൾ സന്തോഷം അമ്പരപ്പിലേക്ക് മാറി.

നോർവേയിലെ ഉൾപ്രദേശത്തെ ചെറിയ ഗ്രാമത്തിലായിരുന്നു ആ ആടുവളർത്തൽ കേന്ദ്രം. അവിടെ എന്ത് കാണാനാണ്? ചരിത്രപ്രാധാന്യമുള്ള ഭൂഭാഗങ്ങളും നഗരങ്ങളും വിട്ട് എന്തിനൊരു ഗ്രാമത്തിൽ പോകുന്നു? കൻഡാൽ എന്ന, 87 പേർ മാത്രം താമസിക്കുന്ന ഗ്രാമത്തിലെത്തിയപ്പോൾ, അവിടെയുള്ള കാഴ്ചകൾ കണ്ടപ്പോൾ ഈ ചോദ്യങ്ങൾക്കെല്ലാം ഉത്തരമായി.

കടലിടുക്കുകളിലൂടെ

നോർവേയിലെ തലസ്ഥാനനഗരമായ ഓസ്ലോ കഴിഞ്ഞാൽ രണ്ടാമത്തെ വലിയ നഗരമാണ് ബെർഗൻ: ലോകപൈതൃകപ്പട്ടികയിലുള്ള നഗരം. പർവതങ്ങളും കടലിടുക്കുകളും അതിരിടുന്ന, ഏകദേശം മൂന്ന് ലക്ഷം ജനസംഖ്യയുള്ള നഗരം. അവിടെനിന്ന് 236 കിലോമീറ്റർ ദൂരെയാണ് ഗ്ലോപ്പൻ മുനിസിപ്പാലിറ്റി. ബെർഗനിൽ നിന്ന് നാലരമണിക്കൂർ കാറിൽ സഞ്ചരിച്ചാൽ ഗ്ലോപെനിലെത്താം.

ഏതാണ്ട് പാതിവഴിയിൽ അഞ്ച് കിലോമീറ്റർ വീതിയുള്ള ഒരു വലിയ കടവുണ്ട്. ഒപ്പഡൽ -ലാവിക് എന്നീ സ്ഥലങ്ങളെ ബന്ധിപ്പിക്കുന്നത്. ഇരുപത് മിനിറ്റ് വേണം ഒരു വലിയ യന്തച്ചങ്ങാടത്തിൽ കടലിടുക്കുകളെ ബന്ധിപ്പിക്കുന്ന കടവ് കടക്കാൻ. ഒരു കാറിന്റെ കടത്തു കൂലി ഏകദേശം 350 രൂപയാണ്. കാർ യാത്രയിലുടനീളം കടലിടുക്കുകളെ തൊട്ടുകൊണ്ട് സഞ്ചരിച്ചു.

 കുത്തനെയുള്ള പർവതനിരകൾക്കിടയിൽ നീലയും മരതകവർണവുമുള്ള വെള്ളം. കരയിൽ കൊച്ചു നഗരങ്ങളും ഗ്രാമങ്ങളും. ഏതാണ്ട് കുത്തനെയുള്ള പർവതശിഖരങ്ങൾക്കിടയിൽ ആയിരത്തൊരുനൂറിലേറെ കടലിടുക്കുകളാണ് (Fjord) നോർവേയിലുള്ളത്. അതിൽ പത്തെണ്ണത്തിലാണ് പ്രധാനമായും സഞ്ചാരികളെയും കൊണ്ട് കപ്പലുകൾ വിനോദയാത്ര നടത്തുന്നത്. ഞങ്ങൾ യാത്ര ചെയ്തിരുന്നത് മിർഡാലിൽനിന്ന് ബെർഗൻ വരെ ഏറ്റവും നീളവും ആഴവുമുള്ള സോൺഫോയ്ഡ് കടലിടുക്കിൽ കൂടിയായിരുന്നു.