കാടകങ്ങളുടെ സ്പന്ദനങ്ങൾ

പല കാലങ്ങളിൽ നേരങ്ങളിൽ കാടകങ്ങളിലേക്ക് ഇറങ്ങിയ ലഖകൻ ആ കാനനഭംഗിയുടെ ജാതകം വായിക്കുന്നു. കാടും മൃഗങ്ങളും മനുഷ്യനും തമ്മിലുള്ള അപൂർവകാഴ്ചകളെ ഓർത്തെടുക്കുന്നു.

- Naseer

സമീപത്തെവിടെയോ കുറിക്കണ്ണൻ പുള്ളിന്റെ മധുരഗീതം. സൂര്യപ്രകാശം മങ്ങിത്തുടങ്ങി. ഇലകൾ പൊഴിച്ചു നിൽക്കുന്ന മരക്കൂട്ടങ്ങൾക്കിടയിലൂടെ ഒരുകൂട്ടം കാട്ടുപോത്തുകൾ വെളിയിലേക്കു വന്നു. അവ അലസമായി നടക്കുകയും കുറ്റിച്ചെടികളിൽ പ്രിയമുള്ളവ മാത്രം തിരഞ്ഞുപിടിച്ച് ഭക്ഷിക്കുകയും ചെയ്തുതുടങ്ങി. മറുവശത്തുള്ള മലനിര കൾക്കു താഴെ നിബിഡമായ കാടാണ്. അവിടം ഇപ്പോൾ ഇരുട്ടുമായി കൂടിക്കുഴഞ്ഞു കൊണ്ടിരിക്കുകയായിരിക്കും. രാപ്പാടികളുടെ ശബ്ദങ്ങൾ മൃദുവായൊരു മന്ത്രണം പോലെ കാറ്റിനൊപ്പം കാതുകളിലെത്തി. ഇരുൾ പടരാൻ ഇനി അധിക നേരമില്ല.

പെട്ടെന്ന് കാട്ടുപോത്തിന്റെ കൂട്ടത്തിൽനിന്ന് ശക്തമായൊരു ചീറ്റലുയർന്നു. അതോടൊപ്പം മുൻകാലുകളുയർത്തി അവ ഭൂമിയിൽ ചവിട്ടുന്ന ശബ്ദങ്ങൾ കേട്ടു. അടുത്തെവിടെയോ കാട്ടുപോത്തുകൾക്ക് ഹിതമല്ലാത്ത ഏതോ സാന്നിധ്യമുണ്ടെന്ന സൂചനകളാണിവയൊക്കെ, അകലെ ല്ലാതെ മയിലിന്റെ അപകടമുന്നറിയിപ്പുള്ള ശബ്ദം. ഇളംകാറ്റിനൊപ്പം കടുവയുടെ രൂക്ഷമായ ഗന്ധം.

കാട്ടുപോത്തിൻ കൂട്ടം പച്ചിലക്കാട്ടിലേക്ക് നീങ്ങി. കൂട്ടത്തിലെ കുഞ്ഞുങ്ങളെ വലിയ കാട്ടുപോത്തുകൾ സുരക്ഷിതമായ ഇടത്തേക്ക് നയിക്കുകയാണ്. രാത്രിയിലെ കാട്, ഏറെ നിഗൂഢവും അവ്യക്തത നിറഞ്ഞ നീക്കങ്ങളാലും വന്യവും വശ്യവുമാകാം. രഹസ്യാത്മകത സൃഷ്ടിക്കുന്ന ശബ്ദങ്ങളും നിഴലുകളും നമ്മൾ അതുവരെ അനുഭവിച്ചിട്ടില്ലാത്തതരം രൂക്ഷഗന്ധങ്ങളും മത്തുപിടിപ്പിക്കുന്നതും മയക്കം വരുത്തുന്നതുമായ പലവിധ സുഗന്ധങ്ങളും എത്തുകയായി. വന്യജീവികളുടെ കണ്ണുകളപ്പോൾ സ്ഫടികംപോലെ തിളങ്ങും. വലിയ വൃക്ഷങ്ങൾക്ക് മറവിൽനിന്നും കാട്ടുപൊന്ത കൾക്കിടയിൽനിന്നും അവ നമ്മെ നോക്കും. ചിലപ്പോൾ അവയിൽ തീക്ഷ്ണമായവയും കാണാനാകും. ശ്രദ്ധിച്ചാൽ അവയിലെ നിറഭേദങ്ങൾ, രണ്ട് കണ്ണുകൾ തമ്മിലുള്ള അകലങ്ങൾ, വലുപ്പവ്യത്യാസങ്ങൾ എന്നിവയിലൂടെ ഏത് ജീവിയാണത് എന്ന് തിരിച്ചറിയാനാകും.

കാട്ടിനകത്തെ വേറിട്ട ശബ്ദങ്ങൾ