മഹാവ്യസനങ്ങളുടെ ഉറവിടം തേടി

സി.വി ബാലകൃഷ്ണന്റെ ആയുസ്സിന്റെ പുസ്തകം' എന്ന നാവൽ പുറത്തിറങ്ങിയിട്ട് നാൽപത് വർഷം പിന്നിടുന്നു. ക്രൈസ്തവജീവിതങ്ങളുടെ അടരുകൾ പ്രമേയമായ കൃതി പിറന്ന ഭൂമികയിലൂടെ എഴുത്തുകാരനോടൊപ്പം ഒരു സഞ്ചാരം

- ARUN P GOPI

റാഹേൽ കരഞ്ഞും കിതച്ചും ഓടുകയായിരുന്നു. വൈകുന്നേരത്തെ നിഴലുവീണ തട്ടുകൾ കയറി അതിരിലെത്തിയപ്പോൾ, എതിരെനിന്ന് ആനിയും യോഹന്നാനും വരുന്നതു കണ്ടു. റാഹേൽ പെട്ടെന്ന് കരച്ചിലടക്കി... ആനി അടുത്തെത്തി അവളോട്, റാഹേൽ നീ കരഞ്ഞതെന്തിന്, നിന്റെ മുഖം വിളറിയിരിക്കുന്നതെന്തു കൊണ്ട്? എന്ന് ചോദിച്ചു. എന്നാറെ അവൾ അത്യന്തം ഭ്രമിച്ച് നടുങ്ങി. പുറത്തേക്ക് വഴിതിരിയുന്ന വലിയ നിലവിളിയോടും കണ്ണുനീരോടും കൂടി അവൾ ഓടിപ്പോയി. ആനിയും യോഹന്നാനും ഭയപ്പെട്ടുനിന്നു. അനന്തരം അവർ റബ്ബർമരങ്ങൾക്കിടയിലൂടെ ഓടി തട്ടുകളിറങ്ങി -(ആയുസ്സിന്റെ പുസ്തകം)

തണുപ്പു നിറഞ്ഞ പ്രഭാതമായിരുന്നു. മലമടക്കുകളിൽ ഉരുണ്ടു കൂടിയ മഞ്ഞിൻകണങ്ങൾ താഴ്വരയെ പുൽകി കടന്നുപോകുന്നു. ശാന്തമായൊഴുകുന്ന പുഴ കണ്ടപ്പോൾ എഴുത്തുകാരൻ ചിന്തയിലാണ്ടിരുന്നു. മനുഷ്യൻ പാപികളായതെന്തിന്, മഹാവ്യസനങ്ങളുടെ കഥയെഴുതിയതെന്തു കൊണ്ട്? എന്ന് ചോദിച്ചു. അനന്തരം കഥാകാരൻ പഴയനിയമത്തിലെ പാപത്തെ വിവരിച്ചു. ഏദൻതോട്ടത്തിൽ നിന്നുമേറ്റ പാപത്തെ അതിനെ ഉൾക്കൊണ്ട് ആയുസ്സിന്റെ പുസ്തകത്തിൽ പൗലോ റാഹേലിനോട് ചെയ്ത ഞങ്ങൾ എഴുത്തുകാരനെ ശ്രവിച്ചു.

മാലോം എന്ന കാസർകോടിന്റെ മലയോരദേശത്തേക്കായിരുന്നു യാത്ര. നാലുപതിറ്റാണ്ടുകൾക്ക് മുൻപ് മലയാളത്തിന്റെ പ്രിയ കഥാകാരൻ സി.വി ബാലകൃഷ്ണന്റെ ആയുസ്സിന്റെ പുസ്തകം' എന്ന നോവലിന് പ്രമേയമായ ഭൂമിക. എഴുത്തുകാരനോടൊപ്പം അയാൾ സൃഷ്ടിച്ച, വ്യസനങ്ങളുടെ ജീവിത കഥ നിറഞ്ഞ ഗ്രാമത്തിലേക്ക്...

"ഈ വ്യസനം പോലെ ഒരു വ്യസനമില്ല' എന്നായിരുന്നു നിരൂപകർ "ആയുസ്സിന്റെ പുസ്തകത്തെ വിശേഷിപ്പിച്ചത്. നോവലിൽ, റാഹേലിനോട് പാപം ചെയ്ത പൗലോ. അയാളുടെ പുത്രൻ തോമ. തോമയുടെ മകൻ യോഹന്നാൻ. വ്യസനങ്ങൾ അവർക്കു മേൽ പെയ്തിറങ്ങി. പൗലോ-അയാളുടേത് ഏകാതയും വാർധക്യവുമായിരുന്നു വ്യസനമായി രൂപാന്തരപ്പെട്ടത്. തോമ-വിഭാര്യനായിരുന്നു. അയാൾക്ക് ജയിലിൽ കിടക്കേണ്ടിവന്നു. യോഹന്നാൻ ഇഷ്ടപ്പെട്ടവരെല്ലാം അവനെ വിട്ടകലുകയായിരുന്നു. ക്രിസ്തീയ ജീവിതത്തിന്റെ അടരുകളും പാപബോധവും പ്രമേയമായ “ആയുസ്സിന്റെ പുസ്തകം മലയാള നോവൽ സാഹിത്യത്തിൽ വേറിട്ട വായനാനുഭവമായിരുന്നു.

ദൂരെ, കുടക് വനത്തോട് ചേർന്ന മഞ്ഞുമൂടിയ പന്ന്യാർമാനി മലനിരകൾ പ്രത്യക്ഷമായി. നാലുവശങ്ങളും കുന്നുകളാൽ ചുറ്റപ്പെട്ട ഗ്രാമമാണ് മാലോം. ഗ്രാമമധ്യത്തിലൂടെ ചൈത്രവാഹിനിപ്പുഴ വരണ്ടൊഴുകുന്നു.